काठमाडौं, २३ कात्तिक । तिहार तथा छठ पर्वको बिदाका दिनहरूमा पनि राष्ट्रिय मानव अधिकार आयोगका केन्द्रीय, प्रदेश तथा प्रदेश शाखा कार्यालयहरू खुला रहने भएका छन्। मानव अधिकार उल्लंघनका घटनाबारे परेका उजुरी लिने र आकस्मिक प्रकृतिका घटनामा अनुगमन गर्ने कामलाई निरन्तरता दिन आयोगले बिदाका दिनसमेत कार्यालय खुला राख्ने व्यवस्था गरेको हो।
आयोगका सहसचिव एवं प्रवक्ता डा. टीकाराम पोखरेलका अनुसार बिदाका दिनमा सम्बन्धित कार्यालयहरू बिहान ११ बजेदेखि दिउँसो २ बजेसम्म खुला रहनेछन्। यस अवधिमा आकस्मिक प्रयोजनका लागि आयोगका कार्यालय वा मोबाइल नम्बरमा सम्पर्क गर्न सकिने जानकारी उनले प्रेस नोटमार्फत दिएका छन्।
आयोगले पर्वका बेला पनि नागरिकले अधिकार हनन्का घटना तत्काल जानकारी गराउन सक्ने र आकस्मिक घटनाको अनुगमन प्रभावित नहुने गरी यो व्यवस्था गरेको हो। उजुरी दर्ता तथा अनुगमनका लागि कार्यालय खुला रहँदा बिदाको अवधिमा पनि सेवा लिन बाधा नपर्ने आयोगको भनाइ छ।
कहाँ–कहाँ छन् कार्यालय?
आयोगको केन्द्रीय कार्यालय ललितपुरको पुल्चोकमा रहेको छ। प्रदेश तथा प्रदेश शाखा कार्यालयहरू देशका विभिन्न जिल्लामा रहेका छन् :
कोशी प्रदेश कार्यालय — विराटनगर
कोशी प्रदेश शाखा कार्यालय — खोटाङ
मधेश प्रदेश कार्यालय — जनकपुर
बागमती प्रदेश कार्यालय — हेटौंडा
गण्डकी प्रदेश कार्यालय — पोखरा
लुम्बिनी प्रदेश कार्यालय — दाङ
लुम्बिनी प्रदेश शाखा कार्यालय — नेपालगञ्ज
कर्णाली प्रदेश कार्यालय — सुर्खेत
कर्णाली प्रदेश शाखा कार्यालय — जुम्ला
सुदूरपश्चिम प्रदेश कार्यालय — धनगढी
उल्लेखित सबै कार्यालयले बिदाका दिन तोकिएको समयभित्र उजुरी तथा आकस्मिक अनुगमनसम्बन्धी काम गर्ने आयोगले जनाएको छ।
