रुकुम पश्चिमको आठबिसकोट नगरपालिका–५ नयाँडाँडामा सोमबार दिउँसो भएको जिप दुर्घटनामा दुई जनाको मृत्यु भएको छ । सोही दुर्घटनामा परी १३ जना घाइते भएका छन्, जसमध्ये ६ जनाको अवस्था गम्भीर रहेको प्रहरीले जनाएको छ ।
थापागाउँबाट नयाँडाँडातर्फ आउँदै गरेको भे १ च ३११२ नम्बरको जिप दिउँसो १२ बजेतिर ब्याक गर्ने क्रममा अनियन्त्रित भई सडकबाट करिब १५० मिटर तल खसेको थियो । दुर्घटनामा परेको जिप अहिले पनि घटनास्थलमै रहेको प्रहरीको भनाइ छ ।
घटनास्थलमै ज्यान गुमाउनेहरू आठबिसकोट नगरपालिका–५ का १० वर्षीय हरिबहादुर थापा र २९ वर्षीय लक्ष्मीराम थापा हुन् । जिप आठबिसकोट नगरपालिका–४ निवासी २५ वर्षीय प्रदीप बिकले चलाएका थिए । दुर्घटनापछि चालक बिक फरार रहेका छन् र उनको खोजी भइरहेको प्रहरीले जनाएको छ ।
गम्भीर घाइते को–को छन्
दुर्घटनामा १९ वर्षीया जुनाकुमारी थापा, ३५ वर्षीय वीरबहादुर थापा, २३ वर्षीया सीता थापा, २३ वर्षीया जुनि थापा, ८ वर्षीय युवराज थापा र ४ वर्षीया वीरता थापा गम्भीर घाइते भएका छन् । घाइतेमध्ये वीरबहादुर जिपका धनी हुन् ।
यसैगरी २५ वर्षीया हीरा थापा र २ वर्षीय गौरव थापा मध्यम अवस्थामा घाइते रहेको प्रहरीले जनाएको छ । सामान्य र मध्यम अवस्थाका ६ जना घाइतेलाई दिउँसो १ः२० बजे उपचारका लागि नगर अस्पताल राडी पठाइएको छ । अन्य घाइतेको उपचारको व्यवस्था मिलाउने प्रयास भइरहेको प्रहरीले जनाएको छ ।
घटनाबारे थप अनुसन्धान तथा उद्धार कार्य जारी रहेको अधिकारीहरूले बताएका छन् ।
