एसिसी पुरुष एसिया कप राइजिङ स्टार्स प्रतियोगितामा सहभागिता जनाउन नेपाली राष्ट्रिय क्रिकेट टोली आज कतारतर्फ प्रस्थान गरेको छ। नेपाल क्रिकेट सङ्घ (क्यान)का अध्यक्ष चतुरबहादुर चन्दले टोलीलाई बिदाइ गरेका थिए।
क्यानले केही दिनअघि नै सन्दीप लामिछानेको कप्तानीमा १५ सदस्यीय टोली घोषणा गरेको थियो। कप्तान लामिछानेसहित लोकेश बम, बसिर अहमद, अर्जुन कुमाल, नन्दन यादव, पवन सर्राफ, ललित राजवंशी, कुशल भुर्तेल, सोमपाल कामी, दीपक डुम्रे, सन्दीप जोरा, अभिषेक गौतम, ईशान पाण्डे, राशिद खान र देव खनाल टोलीमा समावेश छन्।
प्रतियोगिता कतारमा नोभेम्बर १९ बाट सुरु हुनेछ।
समूह चरणको तालिका
समूह चरणमा नेपालले पहिलो खेल नोभेम्बर २० मा भारत ‘ए’ विरुद्ध खेल्ने तालिका छ। त्यसपछि नोभेम्बर २२ मा संयुक्त अरब इमिरेट्स (युएई) र नोभेम्बर २४ मा पाकिस्तान ‘ए’ सँग नेपालको भिडन्त हुनेछ।







