नेपाल प्रिमियर लिग (एनपीएल) अन्तर्गत बुधबार टीयू मैदानमा भएको एलिमिनेटरमा चितवन राइनोजले काठमान्डु गोर्खाजलाई ६१ रनले पराजित गर्दै दोस्रो क्वालिफायरमा प्रवेश गरेको छ । कमिल मिशाराको अविजित शतक र बलरहरूको उत्कृष्ट प्रदर्शन चितवनको जितको आधार बन्यो ।
यो जितसँगै चितवनले फाइनल प्रवेशका लागि बिहीबार सुदूरपश्चिम रोयल्ससँग दोस्रो क्वालिफायर खेल्नेछ । उक्त खेलको विजेताले शनिबार हुने फाइनलमा साविक विजेता लुम्बिनी लायन्ससँग प्रतिस्पर्धा गर्नेछ । लुम्बिनीले पहिलो क्वालिफायरमा सुदूरपश्चिमलाई हराउँदै फाइनलमा स्थान पक्का गरिसकेको छ ।
मिशाराको शतकमा चितवन २०४ रनमा
टस जितेर पहिले ब्याटिङ गरेको चितवनले निर्धारित २० ओभरमा ४ विकेट गुमाएर २०४ रन बनायो । ओपनर कमिल मिशारा अन्तिमसम्म क्रिजमा टिक्दै ५९ बलमा ५ चौका र १० छक्का प्रहार गरी अविजित १२० रन बनाए । यो उनको करियरको तेस्रो टी२० शतक हो भने एनपीएलमा चितवनका लागि अहिलेसम्मकै उच्च व्यक्तिगत स्कोर पनि । यसअघि यसै सिजन लिग चरणमा काठमान्डुविरुद्ध चितवनले बनाएको १७० रन टिमको उच्च स्कोर थियो, जुन खेल चितवन १० रनले हारेको थियो ।
सुरुवातमा मिशाराले देव खनालसँग पहिलो विकेटका लागि २२ रनको साझेदारी गरे । तर चौथो ओभरमा काठमान्डुका कप्तान करण केसीले देव खनाल र डेविड मालानलाई लगातार आउट गर्दा चितवन २२-२ को स्थितिमा पुगेको थियो । देव खनालले १५ बलमा २ चौका र १ छक्कासहित १७ रन बनाए भने मालान पहिलो बलमै क्याचआउट भए ।
त्यसपछि मिशाराले कप्तान रवि बोपारासँग मिलेर तेस्रो विकेटका लागि १५४ रनको साझेदारी गरे । एनपीएलमा चितवनको यो अहिलेसम्मको उच्च साझेदारी हो भने प्रतियोगिताको समग्र इतिहासमा तेस्रो ठूलो साझेदारी । १९औं ओभरको तेस्रो बलमा रासिद खानले बोपारालाई बोल्ड गर्दै यो साझेदारी तोडे । बोपाराले ४२ बलमा ३ चौका र २ छक्कासहित ५३ रन बनाए, जुन यस सिजन उनको दोस्रो अर्धशतक हो । विवेक यादव ३ बलमा २ चौकासहित ८ रन बनाएर आउट भए । काठमान्डुका करण केसी र रासिद खानले समान २-२ विकेट लिए ।
यस सिजन कुनै पनि टिमले २०० रनभन्दा माथिको योगफल बनाएको यो तेस्रो अवसर हो । यसअघि पोखरा एभेन्जर्सले कर्णाली याक्सविरुद्ध २१७ र काठमान्डुविरुद्धै २२४ रन बनाएको थियो ।
काठमान्डु १४३ रनमै रोकियो
२०५ रनको लक्ष्य पछ्याएको काठमान्डुले पूरै २० ओभर ब्याटिङ गरे पनि ९ विकेट गुमाएर १४३ रन मात्र बनाउन सक्यो । काठमान्डुका लागि विलियम बोसिस्टोले २८ बलमा ३ चौका र २ छक्कासहित सर्वाधिक ३७ रन बनाए । भीम सार्कीले १७ बलमा ३ छक्कासहित अविजित ३० रन जोडे । सहान अराचिगेले १३ बलमा २ चौका र १ छक्कासहित २४ रन बनाए भने रासिद खानले १२ रन जोडे ।
ओपनर साहिल पटेल दोस्रो ओभरमै व्यक्तिगत २ रनमा आउट भए । त्यसपछि बोसिस्टोले अर्का ओपनर साम हिजलेटसँग २५ रनको साझेदारी गरे, तर हिजलेट पाँचौ ओभरमा व्यक्तिगत ३ रनमै फर्किएपछि काठमान्डुले ३० रनमा दुई विकेट गुमाएको थियो । बोसिस्टोले रासिद खानसँग तेस्रो विकेटका लागि ३३ रनको साझेदारी गरे पनि त्यसपछि काठमान्डुको पारी छिट्टै थाहा भयो । बोसिस्टो, रासिद र अराचिगेको विकेट गुमेपछि काठमान्डु ९२ रनमा ६ विकेटको अवस्थामा पुगेको थियो ।
कुनै पनि विकेटका लागि ठूलो साझेदारी नबन्दा काठमान्डुको पारी १४३ रनमा टुंगियो । कप्तान करण केसी र जहानदाद खान समान १-१ रनमा आउट भए भने सोनु देवकोटा ६ र सन्तोष यादव १० रनमा फर्किए । दशौं नम्बरमा ब्याटिङ गर्न आएका भीम सार्कीले भने अन्तिमसम्म टिक्दै टिमको स्कोरलाई केही माथि पुर्याए ।
चितवनका लागि रिजन ढकालले ४ ओभरमा १६ रन खर्चेर ४ विकेट लिए भने उसामा मिरले ४ ओभरमा १५ रन खर्चेर ३ विकेट हात पारे । कुशल मल्ल र सलाउद्दीन खानले समान १-१ विकेट लिए ।







