विदेश छाडेर कृषि–पशुपालनमा लागे सल्यानका युवा, लाखौंको आम्दानी

सल्यान — वैदेशिक रोजगारीको लागि घर छाड्ने प्रवृत्तिलाई पन्छाउँदै जिल्लाका केही युवा कृषि तथा पशुपालन व्यवसायमा होमिएका छन्। उनीहरूले लाखौं रुपैयाँको आम्दानी गरेर अरूलाई समेत रोजगारी दिन सफल भएका छन्। जिल्लाको आर्थिक अवस्थामा समेत यसले सकारात्मक प्रभाव पारेको छ।

पोखरसिंहको किवी बगैंचा

त्रिवेणी गाउँपालिका–३ पिमखोलाका ३२ वर्षीय पोखरसिंह डाँगीले २०७४ मा राहदानी बनाएर अस्ट्रेलिया जाने तयारी गरेका थिए। तर विदेशमा धेरैले भोग्नुपरेको दुःख देखेर उनले त्यो योजना रोके। २०७५ मा आफ्नै दुई बिघा जग्गामा ४० लाख रुपैयाँ लगानी गरी २७२ बोट किवी रोपे। चार वर्षपछि फल लाग्न थालेपछि पहिलो वर्ष २ लाख रुपैयाँ आम्दानी भयो। अहिले सबै बोटमा फल लाग्दा यस वर्ष १० लाख रुपैयाँ आम्दानी हुने उनको अपेक्षा छ। उनले थप दुई बिघामा किवी विस्तारको तयारी गरेका छन्।

तारादेवको कुखुरा र अदुवा

बागचौर नगरपालिका–७ माडीचौरका ४५ वर्षीय तारादेव ओलीले २०५८ मा गैरसरकारी संस्थामा काम गर्थे। माओवादी द्वन्द्वका बेला उनी नेपालगन्ज गएर २०६८ सम्म मसला उद्योग चलाए। लोगो चोरीको मुद्दा परेपछि २०७० मा घर फर्किएर खेतीपाती सुरु गरे। घरखर्च धान्न गाह्रो भएपछि २०७६ मा १ हजार ब्रोइलर कुखुरा पाले। पहिलो वर्ष १ लाख नाफा भएपछि व्यावसायिक रूपमा २० देखि २५ हजार कुखुरा पाल्न थाले। वार्षिक २० लाख रुपैयाँसम्म कमाउने उनले अहिले ४० रोपनी पाखो जग्गामा अदुवा खेती पनि थालेका छन्। करिब २ करोड लगानी गरेका उनले हरेक वर्ष ८० लाख रुपैयाँको कुखुरा र अदुवा बिक्री गर्छन्। गत वर्ष ४० लाख बचत गरेका उनले दर्जनभन्दा बढीलाई रोजगारी दिएका छन्।

तरकारी र फलफूलमा युवाको सक्रियता

शारदा नगरपालिका–७ रामेखोलाका ३५ वर्षीय उत्तम थापाले पाँच वर्षदेखि व्यावसायिक तरकारी खेती गरिरहेका छन्। शिक्षण पेसा छाडेर २५ रोपनी भाडाको जग्गामा तरकारी खेती गर्दै आएका उनले वार्षिक १५ लाख रुपैयाँसम्म कमाइ गरेको बताए। उनले ११/१२ जनालाई रोजगारी दिएको र कमाइले जमिनजग्गा जोडेको उल्लेख गरे। त्यस्तै, बागचौर–९ डाँगीगाउँका ३५ वर्षीय झलक डाँगीले औषधि पसल छाडेर २०७७ मा भिजन कृषि तथा नर्सरी फर्म दर्ता गरी सुन्तला खेती र फलफूल नर्सरी सञ्चालन गरिरहेका छन्। वार्षिक ३५ लाख रुपैयाँको बिरुवा बिक्री गरी २० लाख बचत गर्ने उनले ६/७ जनालाई रोजगारी दिएको र नेपालगन्जमा घर तथा घडेरी किन्न सफल भएको बताए।

कृषि विकास कार्यालयको सहयोग

कृषि विकास कार्यालय सल्यानका प्रमुख महेश आचार्यले कृषि तथा पशुपालनमा लागेका युवालाई प्राथमिकता दिएर सिँचाइ कुलो, पोखरीलगायत सामग्री र प्राविधिक सहयोग गरिरहेको बताए। उनका अनुसार यस व्यवसायले जिल्लाका धेरैको आर्थिक अवस्था सुधारेको छ र युवाकै सक्रियताले सल्यान कृषिमा आत्मनिर्भर बनेको छ।