सिन्धुपाल्चोकस्थित नेपाल–चीन व्यापारिक नाका तातोपानी कात्तिक १ गतेदेखि अस्थायी रूपमा मात्र सञ्चालनमा आएको छ र यसलाई नियमित रूपमा खुला राख्न माग गरिएको छ। तीन दिनका लागि सीमित अवधि तोकिएकाले चाडपर्वका लागि ल्याइएका सामान सीमापारि नै रोकिने अवस्था रहेको व्यवसायीहरूले जनाएका छन्।
नेपाल हिमालय सीमापार वाणिज्य संघका महासचिव रामचन्द्र पराजुलीका अनुसार चीनको सिचाङस्थित न्यालम क्षेत्रमा दशैं र तिहारलक्षित सामान बोकेका ४५ भन्दा बढी कन्टेनर अड्किएका छन्। तीन दिनको सीमित सञ्चालन अवधिभित्र ती सबै कन्टेनर भित्र्याउन नसकिने भन्दै उनले नाका निरन्तर चल्नुपर्ने बताए।
अड्किएका कन्टेनरमा रहेको ठूलो हिस्सा नाशवान् वस्तु, कृषि उत्पादन तथा मौसमी व्यापारिक सामग्री रहेको र ती छिट्टै बिग्रने जोखिम रहेको महासचिव पराजुलीको भनाइ छ। सोही कारण नाका पूर्ण रूपमा सञ्चालनमा आउनुपर्ने उनको आग्रह छ।
संघले यसअघि नै चीन सरकार र नेपालस्थित चिनियाँ दूतावासमा ध्यानाकर्षण पत्र बुझाएर नाका निरन्तर सञ्चालन गर्न माग गरिसकेको पराजुलीले जानकारी दिए।
दुई दिनमा जम्मा १० कन्टेनर
तातोपानी भन्सार कार्यालयका भन्सार अधिकृत नरेन्द्रसिंह चैसिरका अनुसार आइतबार तीन वटा मालवाहक कन्टेनर भित्रिएका थिए भने त्यसपछिको दिन साँझसम्म सात वटा मात्र भित्रिए। यसरी दुई दिनको अवधिमा जम्मा १० कन्टेनर नेपाल भित्रिएका छन्।
चीनले कार्गो ट्रकका लागि मात्र अनुमति दिएकाले साना कन्टेनरहरू आउन नसकेको अधिकृत चैसिरले बताए। भित्रिएका कन्टेनरमा फलफूल, जुत्ता, तयारी पोशाक तथा कृषिजन्य सामग्री रहेको भन्सार कार्यालयले जनाएको छ।
अन्य नाकाहरू सञ्चालनमा नरहेको अवस्थामा दुई देशबीचको व्यापार सहज बनाउन तातोपानी नाका पूर्ण रूपमा खुलाउनु आवश्यक रहेको संघका महासचिव पराजुलीको भनाइ छ।
