दशैं नजिकिँदै गर्दा काठमाडौं उपत्यका छाड्ने यात्रुहरूको संख्या उल्लेख्य रूपमा बढेको छ। काठमाडौं उपत्यका ट्राफिक प्रहरी कार्यालयका अनुसार पछिल्लो २४ घण्टामा आठ वटा नाकाबाट गरी ५६ हजार ८०९ जना उपत्यका बाहिरिएका छन्।
उपत्यका बाहिरिने क्रममा नागढुंगा नाका सबैभन्दा व्यस्त देखिएको छ। सो नाकाबाट मात्र २७ हजार ६४९ जना गएका छन्, जुन कुल संख्याको करिब आधा हिस्सा हो। त्यसपछि भक्तपुर नाकाबाट २० हजार ६१५ र फर्पिङ नाकाबाट ५ हजार ५१० जना बाहिरिएका छन्।
राजधानीमा काम तथा अध्ययनका सिलसिलामा बसोबास गर्दै आएका हजारौँ मानिस नेपालको सबैभन्दा ठूलो चाड दशैं मनाउन आआफ्नो गृहक्षेत्र फर्किने क्रममा यो संख्या देखिएको हो।
राजमार्गमा अवरोध, यात्रा लामो
यातायात तथा ट्राफिक व्यवसायीहरूले भने राजमार्गमा पुगेको क्षति र यातायात अवरोधका कारण यात्रा लामो र कष्टकर बनेको चेतावनी दिएका छन्। विशेषगरी पृथ्वी राजमार्गमा सडक अवरोध हुँदा अग्रिम टिकट बुक गरेर हिँडेका यात्रुसमेत बीच बाटोमा अलपत्र पर्ने र सास्ती खेप्नुपर्ने अवस्था रहेको उनीहरूको भनाइ छ।
यात्रुलाई व्यवसायीको सुझाव
यातायात व्यवसायीहरूले यात्रुलाई टिकट अग्रिम रूपमा काट्न, स्वीकृत भाडाभन्दा बढी रकम नतिर्न तथा घरबाट निस्कनुअघि सवारी साधनको अवस्था जाँच गर्न आग्रह गरेका छन्।
