चितवन — भारी वर्षाको पूर्वानुमानपछि चितवन जिल्ला प्रशासन कार्यालयले शनिबार राति १० बजेदेखि नारायणगढ–मुग्लिन सडक र मुग्लिन पछिको पृथ्वी राजमार्गमा गाडी चलाउन रोक लगाएको छ। प्रशासनले यी मुख्य सडकमा अर्को सूचना जारी नगरिएसम्म यातायात बन्द रहने जनाएको छ।
चितवनका प्रमुख जिल्ला अधिकारी गणेश अर्यालका अनुसार काठमाडौं जाने–आउने यी सडकमा गाडी चल्न नदिने निर्णय गरिएको हो। उनले भने, ‘भारी वर्षाको सम्भावनाका कारण सडकमा पहिरोको जोखिम बढेको छ। यात्रुहरूको सुरक्षाका लागि यो निर्णय लिइएको हो।’
चितवनका छिमेकी जिल्लामा पानी पर्न सुरु भइसकेको छ। बर्खायाममा नारायणगढ–मुग्लिन सडक र पृथ्वी राजमार्गको धादिङ तथा चितवन खण्ड पहिरोको उच्च जोखिममा रहने गर्छ। पछिल्लो समय जलवीरे नजिक पहिरो खसेको थियो। प्रशासनले आवश्यकता अनुसार अर्को निर्णय लिने बताएको छ।