धनकुटा। सप्तकोशी नदीमा त्रिवेणी नजिक यात्रुवाहक मोटरबोट पल्टिँदा एक बालिकासहित तीन जनाको मृत्यु भएको छ भने तीन जना अझै बेपत्ता छन्। आइतबार दिउँसो करिब २ बजे भोजपुरको हतुवागढी गाउँपालिकाअन्तर्गत कोप्चेबाट सुनसरीको चतरातर्फ जाँदै गरेको बोट नियन्त्रण गुमाएर नदीमा पल्टिएको प्रहरीले जनाएको छ।
ओबीएम कम्पनीले सञ्चालन गरेको उक्त बोटमा १५ जना सवार थिए। दुर्घटनापछि प्रहरी र सशस्त्र प्रहरी बलको टोली तत्काल परिचालन गरी उद्धार सुरु गरिएको र चालकसमेत १२ जनालाई नदीबाट बाहिर निकालिएको प्रहरीले जनाएको छ।
उद्धार गरिएकामध्ये तीन जनाको चतरा अस्पतालमा उपचारका क्रममा मृत्यु भएको छ। मृतकमध्ये सुनसरीको बराहक्षेत्र नगरपालिका–१ निवासी ५२ वर्षीया लीला राईको पहिचान खुलेको छ। करिब छ–सात वर्षकी एक बालिका तथा अन्दाजी ४० देखि ५० वर्षका एक पुरुषको भने सनाखत हुन बाँकी रहेको अधिकारीहरूले जनाएका छन्।
दुर्घटनाबाट चालक सुमन मगर (२४) समेत नौ जना बाँचेका छन्।
तीन बेपत्ताको खोजी जारी
बेपत्ताहरूमा झापाको कन्काई नगरपालिका–४ निवासी शिवक मगर (७), बराहक्षेत्र–१ निवासी प्रमिला मगर (२१) र सोही ठाउँकी मनु राई (२२) छन्। उनीहरूको खोजीका लागि धनकुटा जिल्ला प्रहरी प्रमुख नारायण रण्जितकारको नेतृत्वमा १४ जना प्रहरी परिचालन गरिएको छ भने सशस्त्र प्रहरी बलका १६ जना पनि नदी क्षेत्रमा खटाइएको छ।
दुर्घटनाको कारण भने खुल्न सकेको छैन। सुरुआती जानकारीअनुसार बोटको ब्रेक फेल भएर पल्टिएको हुनसक्ने आशंका गरिएको छ र घटनाबारे अनुसन्धान भइरहेको प्रहरीले जनाएको छ।
