काठमाडौं उपत्यकामा शनिबार ट्राफिक नियम उल्लंघन गरेको आरोपमा ४७० सवारीमाथि कारबाही गरिएको काठमाडौं उपत्यका ट्राफिक प्रहरी कार्यालयले जनाएको छ। कार्यालयका प्रवक्ता, प्रहरी उपरीक्षक नरेशराज सुवेदीका अनुसार उपत्यकाका विभिन्न स्थानमा गरिएको चेकजाँचका क्रममा ती सवारी कारबाहीमा परेका हुन्।
कारबाहीमा परेकामध्ये सबैभन्दा ठूलो समूह तीव्र गतिमा सवारी चलाउनेको रहेको छ। प्रहरीका अनुसार ११५ सवारी तीव्र गतिका कारण कारबाहीमा परेका छन्। यस्तै मादक पदार्थ सेवन गरेर सवारी चलाइरहेका ९९ जना चालकविरुद्ध कारबाही गरिएको प्रवक्ता सुवेदीले जानकारी दिए।
सीसीटिभी निगरानीमार्फत ट्राफिक नियम उल्लंघन गरेको पहिचान भएका ४० सवारीमाथि कारबाही भएको छ भने ट्राफिक संकेत नमानेका ३७ सवारी पनि कारबाहीको दायरामा आएका छन्। यसैगरी सवारीमा मनपरी हर्न बजाएको आरोपमा ९, लेन उल्लंघन गरेको आरोपमा २ र एकतर्फी बाटोमा गलत तरिकाले प्रवेश गरेको आरोपमा ७ सवारीमाथि कारबाही गरिएको कार्यालयले जनाएको छ।
अन्य विभिन्न ट्राफिक उल्लंघनका आरोपमा थप १६१ सवारीमाथि कारबाही भएको छ। उपत्यकामा दशैं पर्वका बेला ट्राफिक नियम उल्लंघन गर्ने सवारीमाथिको निगरानी र कारबाही बढाइएको ट्राफिक प्रहरीले जनाएको छ।
पर्वका बेला सडकमा सवारीको चाप बढ्ने भएकाले नियम उल्लंघन गर्ने चालकविरुद्ध निरन्तर कारबाही अघि बढाइने कार्यालयको भनाइ छ।
