फ्रान्सको दक्षिणपश्चिम भागमा फैलिएको जंगली आगोले ठूलो जनधनको क्षति पुर्याएको छ। आइतबार राति एकैपटक ५५,००० मानिसलाई सुरक्षित स्थानमा सारिएको छ। यससँगै गिरोन्डे क्षेत्रमा मात्र विस्थापित हुनेको संख्या २२०,००० पुगेको छ।
गिरोन्डे क्षेत्र प्रशासनले बोर्डो सहरको दक्षिणपश्चिमका पाँच थप स्थानीय तहमा रातारात विस्थापनको आदेश जारी गरेको थियो। हावाको गतिले आगोलाई थप भड्काएको र मध्य सातादेखि नियन्त्रण बाहिर गएको आगोको फैलावट तीव्र भएको प्रशासनको भनाइ छ।
गिरोन्डेका प्रिफेक्टले बोर्डोबाट दक्षिणपश्चिमतर्फ जाने प्रमुख राजमार्गको आंशिक बन्द गर्ने आदेश दिएका छन्। बोर्डोका मेयरले आगो महानगरीय क्षेत्रको ‘गेट’ मा पुगेको बताएका छन्। नजिकको दूरी करिब १५ किलोमिटर रहेको उनले जानकारी दिए।
यसैबीच, लान्डेस क्षेत्रमा पनि अर्को आगो लागेको छ, जसले गर्दा यस साता ३०,००० मानिस विस्थापित भएका छन्। दुवै आगोले गर्दा कुल विस्थापित संख्या २५०,००० नाघेको छ।
छिमेकी देश स्पेनमा पनि आगोको प्रकोप देखिएको छ। म्याड्रिडको पश्चिमी भागमा लागेको आगोका कारण ७०,००० मानिसलाई सुरक्षित स्थानमा सारिएको छ।
