काठमाडौं, २१ साउन । प्रगतिशील लोकतान्त्रिक पार्टी (प्रलोपा) विभाजित भएसँगै नेता राम कार्कीले पनि पार्टीबाट बाहिरिने घोषणा गरेका छन्। उनले अब आफू ‘मार्क्सिस्ट स्कुल अफ प्राक्सिस’मा अनुबन्धित भइसकेको र त्यहीँ क्रियाशील रहने जानकारी दिएका छन्।
प्रलोपामा रहँदा पाएको न्यानो व्यवहारप्रति धन्यवाद दिँदै उनले पार्टीको वैचारिक रूपमा निर्वाचनताका नै विघटन भइसके पनि संगठनात्मक रूपमा भने आज मात्रै विभाजन देखिएको बताए।
पूर्वप्रधानमन्त्री बाबुराम भट्टराई, पूर्वमाओवादी नेता जनार्दन शर्मा, पूर्वरास्वपाका नेता सन्तोष परियारलगायतले स्थापना गरेको प्रलोपाबाट यसअघि नै सुदन किराँती, ओजस्वी भट्टराईलगायतका नेताहरू बाहिरिसकेका छन्। अहिले अध्यक्ष परिषद्मा रहेका दुर्गा सोब र सन्तोष परियार पनि छुट्टिने सहमतिमा पुगेका छन्।
दुवै समूहबीचको सहमति
आजै भएको सहमतिअनुसार बाबुराम भट्टराईले प्रलोपा स्थापना हुनुअघि बनाएको ‘नेपाल समाजवादी पार्टी (नयाँ शक्ति)’ पुनः सक्रिय हुने भएको छ। यस पार्टीको नेतृत्व दुर्गा सोबले गर्नेछिन् र चुनाव चिह्न आँखा नै राखिने सहमति छ।
त्यस्तै, सन्तोष परियारको पक्षले भने प्रलोपा नै कायम राख्ने भएको छ। उक्त पार्टीको चुनाव चिह्न आँखाबाहेक तीन रङको हुने गरी प्रक्रिया अघि बढाउने सहमति भएको छ।
कार्कीको धारणा
नेता कार्कीले विभाजनसँगै भएको सहमतिप्रति आफू सन्तोषजनक रहेको बताएका छन्। उनले प्रलोपामा आबद्ध रहँदा पाएको व्यवहारप्रति आभार व्यक्त गर्दै अब ‘मार्क्सिस्ट स्कुल अफ प्राक्सिस’मा मात्रै रहने स्पष्ट पारेका छन्।
विभिन्न पृष्ठभूमिका नेताहरू मिलेर बनेको प्रलोपाको यो औपचारिक विभाजनलाई पार्टीको राजनीतिक यात्रामा नयाँ मोडका रूपमा हेरिएको छ।