राष्ट्रिय प्रजातन्त्र पार्टीका प्रवक्ता एवं प्रचार विभाग प्रमुख मोहनकुमार श्रेष्ठले नेपाली कांग्रेसका पूर्वसभापति शेरबहादुर देउवाको स्वदेश फिर्तीको उद्देश्यबारे प्रश्न उठाएका छन्। स्वास्थ्य उपचारका लागि सिंगापुर गएका देउवा उपचारपछि स्वदेश फर्किएका हुन्, तर उनको फिर्तीको स्पष्ट राजनीतिक उद्देश्य देखिन नसकेको श्रेष्ठले बताएका छन्।
श्रेष्ठले सामाजिक सञ्जालमार्फत धारणा सार्वजनिक गर्दै देउवाको फिर्तीलाई ०३३ सालमा बीपी कोइरालाको भारतबाट स्वदेश फिर्तीसँग तुलना गरेका छन्। बीपीको फिर्ती राष्ट्रिय मेलमिलाप नीति र राजसंस्थाको निरन्तरतासँग जोडिएको थियो, तर देउवाले त्रिभुवन विमानस्थलमै त्यस्तो कुनै स्पष्ट राजनीतिक सन्देश दिन नसकेको उनको भनाइ छ।
बीपीको फिर्तीसँग तुलना
श्रेष्ठको सामाजिक सञ्जाल पोस्टमा एकपटक प्रधानमन्त्री भएका बीपी कोइराला ०३३ मा भारतबाट फर्किएको र पाँचपटक प्रधानमन्त्री भएका देउवा ०८३ मा सिंगापुरबाट फर्किएको उल्लेख छ। बीपीको फिर्तीको राष्ट्रिय मेलमिलाप नीतिसँग सम्बन्ध रहेको भन्दै श्रेष्ठले देउवाको फिर्तीको अर्थ भने बुझ्न बाँकी रहेको टिप्पणी गरेका छन्।
नेपाली कांग्रेसको आन्तरिक विवादलाई मात्र केन्द्रमा राखेर देउवा फर्किएको हो कि भन्ने प्रश्न पनि श्रेष्ठले उठाएका छन्। यदि आन्तरिक किचलोमा मात्र सीमित भए उनको फिर्तीको राष्ट्रिय अर्थ नरहने उनले बताए।
देउवाबाट अपेक्षा र छनोटको प्रश्न
श्रेष्ठका अनुसार देउवाले देशबाट धेरै पाएका छन्, तर देशलाई दिन अझै धेरै बाँकी छ। देशले देउवाबाट थप योगदानको अपेक्षा गरेको उनको भनाइ छ।
श्रेष्ठले अन्त्यमा देउवाको राजनीतिक भूमिकाबारे प्रश्न गर्दै सफल राष्ट्रिय नेताको हैसियतमा अगाडि बढ्ने कि असफल गुटको राजनीतिमा सीमित रहने भन्ने छनोट देउवाकै हातमा रहेको बताएका छन्।
देउवा स्वास्थ्य उपचारपछि स्वदेश फर्किएर नेपाली कांग्रेसको आन्तरिक एकता र राष्ट्रिय एकताका विषयमा धारणा सार्वजनिक गरेको सन्दर्भमा श्रेष्ठको यो टिप्पणी आएको हो।
