झापामा पछिल्लो चार महिनामा जापानी इन्सेफ्लाइटिसको संक्रमण पुष्टि भएका नौ जनामध्ये पाँच जनाको मृत्यु भएको छ। स्वास्थ्य कार्यालय झापाका अनुसार मृत्यु हुनेमा तीन पुरुष र दुई महिला रहेका छन्।
कार्यालयका अनुसार संक्रमण पुष्टि भएकामध्ये मेचीनगरमा तीन, बिर्तामोडमा दुई तथा हल्दीबारी, बाह्रदशी, कचनकवल र अर्जुनधारामा एक–एक जना रहेका छन्।
स्वास्थ्य कार्यालयका सार्वजनिक स्वास्थ्य निरीक्षक विश्वनाथ श्रेष्ठले संक्रमितमध्ये अधिकांश ५० वर्षभन्दा माथिका रहेको बताए। उनले रोगको जोखिम बढेकाले सतर्कता अपनाउनु आवश्यक रहेको औंल्याए।
जापानी इन्सेफ्लाइटिस क्युलेक्स जातको लामखुट्टेको टोकाइबाट सर्ने भाइरल संक्रमण हो, जसले मस्तिष्कलाई असर गर्छ। सुँगुर र हाँसलाई यस रोगको मुख्य स्रोत मानिन्छ। सुँगुर पाल्ने तथा धान खेत र जलमग्न क्षेत्रको नजिक बस्ने मानिसहरूले पर्याप्त सावधानी नअपनाएमा विशेष जोखिममा पर्ने बताइएको छ।
खोप अधिकृत राजकुमार पोखरेलले लामखुट्टेको टोकाइबाट बच्न र सरकारको नियमित खोप कार्यक्रममार्फत खोप लगाउन सबैलाई आग्रह गरेका छन्।
