काठमाडौंमा आज नेपाली कांग्रेसको संस्थापन इतर समूहको राष्ट्रिय भेला हुँदैछ । भेला बिहान ११:३० बजे सुकेधारास्थित मिराकल पार्टी प्यालेसमा सुरु हुनेछ । निवर्तमान सभापति शेरबहादुर देउवाले सोही भेलामा सम्बोधन गर्ने तयारी छ ।
पाँच महिनापछि स्वदेश फिर्ती
देउवा स्वास्थ्य उपचारका लागि पाँच महिना विदेश बसेका थिए । साउन २८ गते दिउँसो उनी काठमाडौं फर्किएका हुन् । कांग्रेस नेता–कार्यकर्ताहरूले उनको भव्य स्वागत गरेका थिए । विदेशबाट फर्किएलगत्तै उनी आजको राष्ट्रिय भेलामा सहभागी हुन लागेका हुन् ।
दुई दिने बन्दसत्र
इतर समूहको प्रचार–प्रसार समिति संयोजक मीन विश्वकर्माले भेलाको बन्दसत्र साउन ३० र ३१ गते हुने जानकारी दिएका छन् । बन्दसत्रका क्रममा विषयगत छलफल हुने र नयाँ नीति तथा कार्यक्रम तय गरिने नेताहरूको भनाइ छ ।
इतर समूहले भेलामा पाँच हजार नेता–कार्यकर्ता सहभागी हुने अनुमान गरेको छ ।
