खोटाङको दिप्रुङ चुइचुम्मा गाउँपालिका–५ सछितापोखरीस्थित धापमा ट्याक्टरमा काठ लोड गर्ने क्रममा मुढाले किच्दा एक जनाको मृत्यु भएको छ ।
घटनाको विवरण
को २ त ९६९९ नम्बरको ट्याक्टरमा उत्तिसको काठ लोड गरिँदै थियो । साउन २९ गते बिहान ४ बजेको झिसमिसमा काठ लोड गर्ने क्रममा ट्याक्टरको डालाबाट मुढासँगै लडी झर्दा पाख्रिबास नगरपालिका–३ धनकुटाका ३५ वर्षीय लिला मगरको ज्यान गएको हो ।
ट्याक्टरबाट लडेको मुढासँगै मगर पनि भुईंमा खसेका थिए । जिल्ला प्रहरी कार्यालय खोटाङका सूचना अधिकारी प्रहरी निरीक्षक निराजन बस्नेतका अनुसार मुढा लागेर उनको घटनास्थलमै मृत्यु भएको हो ।
प्रहरी कारबाही
घटनाको जानकारी पाउनासाथ अस्थायी प्रहरी चौकी छितापोखरीबाट खटिएको प्रहरी वरिष्ठ हवल्दार उमाकान्त राय नेतृत्वको टोलीले घटनास्थल सुरक्षित गरेको थियो ।
ट्याक्टर चालक महालक्ष्मी नगरपालिका–३ धनकुटाका १९ वर्षीय सुनिल गुरुङलाई अस्थायी प्रहरी चौकी छितापोखरीले नियन्त्रणमा लिएको छ ।
