अविरल वर्षापछि मोदीखोलामा आएको बाढीले कास्की र पर्वत जोड्ने दुई मेटल पुल बगाउँदा मन्दिर परिसरमा फसेका तीन जनाको सकुशल उद्धार गरिएको छ।
सशस्त्र प्रहरी बल नेपालका डीएसपी शैलेन्द्र थापाले शुक्रबार बिहान सवा दुई बजेतिर आएको बाढीले ती पुलहरू बगाएपछि मन्दिरमा फसेकाहरूलाई सकुशल उद्धार गरिएको जानकारी दिए।
बाढीले बगायो दुई पुल
मोदीखोलामा आएको बाढीले कास्की र पर्वत जोड्ने दुईवटा मेटल पुल बगाएको थियो। पुल बगाएसँगै मन्दिर परिसरमा रहेकाहरू अलपत्र परेका थिए।
उद्धार गरिएकाहरूमा कास्कीको पोखरा महानगरपालिका–१८ सराङकोटका २८ वर्षीय प्रदीप ढकाल, सर्लाही घर भई कास्कीको अन्नपूर्ण गाउँपालिका–८ मा रहेको बिरेठाँटी माध्यमिक विद्यालयका शिक्षक ३० वर्षीय रेवन्तप्रसाद सिंह र मन्दिरका पुजारी ५२ वर्षीय कानिर्माण गिरी छन्।
रोप रेस्क्यु र गोताखोरसहितको टोली
उनीहरूलाई शुक्रबार बिहान सवा आठ बजे सशस्त्र प्रहरी बल नेपाल नं. २४ कालिका गण कास्कीबाट गएको रोप रेस्क्यु र गोताखोरसहितको संयुक्त टोलीले सकुशल उद्धार गरेको डीएसपी थापाले बताए।
बाढीका कारण मन्दिर परिसरमा फसेका तीनै जनाको उद्धार भएको उनले पुष्टि गरे।
