कञ्चनपुरको बनबासा पुलबाट महाकाली नदीमा हाम फालेका २७ वर्षीय युवकको खोजी जारी छ। नेपाल–भारत सीमास्थित बनबासा पुलबाट शुक्रबार युवकले नदीमा हाम फालेका थिए।
दार्चुलाको लेकम गाउँपालिका–६ मूल घर भएका सुनिल खत्री भारतमा काम गर्दै आएका थिए। उनी घटनाअघि बिहीबार मात्र कञ्चनपुरको भीमदत्त नगरपालिका–३ भासीस्थित दिदीको घर आइपुगेका थिए।
युवकले पुलबाट हाम फालेको सूचना पाएपछि नेपाल र भारत दुवैतर्फका सुरक्षाकर्मी खोजीमा परिचालित भएका थिए। शुक्रबार साँझ अँध्यारो भएपछि खोजी रोकिएको थियो। शनिबार बिहान करिब ७ बजेदेखि खोजी पुनः सुरु गरिएको छ।
संयुक्त टोली परिचालित
खोजीका लागि नेपाली सेना, नेपाल प्रहरी र सशस्त्र प्रहरी बलको संयुक्त टोली परिचालित गरिएको छ। विपद् व्यवस्थापनमा तालिमप्राप्त कर्मचारीसमेत रहेको टोलीले रबर बोट प्रयोग गरेर नदीमा खोजी गरिरहेको छ।
सशस्त्र प्रहरी बलका उपरीक्षक तथा सशस्त्र प्रहरी बल नं. ३५ बटालियन शैलेश्वरीका प्रमुख प्रेमप्रकाश सिग्देलका अनुसार नेपाल र भारतका सुरक्षाकर्मी संयुक्त रूपमा खोजीमा सहभागी छन्।
महाकालीको बहावले खोजीमा कठिनाइ
महाकाली नदीमा तीव्र बहाव रहेकाले खोजी कार्य जटिल बनेको छ। सुरक्षाकर्मीले उपलब्ध साधन र स्रोत प्रयोग गरेर नदीका सम्भावित क्षेत्रमा खोजी निरन्तर जारी राखेको बताएका छन्।
