मकवानपुरको भीमफेदी गाउँपालिका–६ स्थित जुरीखेलमा मंगलबार बिहान स्कार्पियो गाडी अनियन्त्रित भई करिब ६० मिटर तल खसेको छ। दुर्घटनामा उच्च अदालत वीरगन्जका प्रधानन्यायाधीश गोकर्ण डंगी र रजिस्ट्रार तारादत्त बडूसहित ६ जना घाइते भएका छन्।
जिल्ला प्रहरी कार्यालय मकवानपुरका अनुसार प्रदेश ३–०१–००२ झ ५१८३ नम्बरको स्कार्पियो जुरीखेलमा नियन्त्रण गुमाएर सडकबाट भिरमा खसेको हो। दुर्घटनापछि स्थानीयले प्रहरीलाई खबर गरेका थिए।
घाइतेको पहिचान
घाइते हुनेमा ५७ वर्षीय प्रधानन्यायाधीश डंगी, ५१ वर्षीय रजिस्ट्रार बडू, उनकी श्रीमती ४९ वर्षीया लक्ष्मी बडू, छोरा २५ वर्षीय रितेन्द्र बडू, छोरी ३१ वर्षीया रिता बडू र ३२ वर्षीय चालक छुनिलाल चौधरी छन्।
डंगी दाङको तुलसीपुर उपमहानगरपालिका–९ का हुन् भने बडू बैतडीको दशरथचन्द नगरपालिका–७ का हुन्। चौधरी दाङको राप्ती नगरपालिका–८ का हुन्।
प्रहरीका अनुसार लक्ष्मी बडूको अवस्था गम्भीर छ भने अन्य पाँच जनाको मध्यम खालको चोट लागेको छ।
उद्धार र उपचार
घाइते सबैलाई उद्धार गरी भीमफेदी अस्पताल पुर्याइएको छ। थप उपचारका लागि उनीहरूलाई काठमाडौं सार्ने तयारी भइरहेको जिल्ला प्रहरी कार्यालय मकवानपुरका प्रवक्ता तथा प्रहरी नायब उपरीक्षक माधव काफ्लेले जानकारी दिए।
दुर्घटनापछि भीमफेदीस्थित प्रहरी कार्यालयबाट ट्राफिक प्रहरीसहित सात सदस्यीय टोली घटनास्थल पुगेको थियो। मकवानपुर जिल्ला प्रहरी प्रमुख तथा प्रहरी उपरीक्षक श्यामबहादुर खातीको नेतृत्वमा रहेको टोली पनि उद्धारका लागि घटनास्थल पुगेको थियो।
