शुक्रबार तराईका केही भागमा अधिकतम तापक्रम ३७ डिग्री सेल्सियससम्म पुग्ने भएको छ। यसैबीच, देशका पहाडी क्षेत्रमा भारी वर्षाको सम्भावना रहेको मौसम पूर्वानुमान महाशाखाले जनाएको छ। मनसुनको प्रभाव कायम रहेका कारण देशका अधिकांश भागमा गर्जन, हावासहितको वर्षा हुने देखिन्छ।
महाशाखाका अनुसार भैरहवा र सिमरामा अधिकतम तापक्रम ३५ देखि ३७ डिग्री सेल्सियससम्म रहनेछ। दिपायल, नेपालगन्ज र विराटनगरमा पनि ३४ देखि ३६ डिग्रीसम्म तापक्रम पुग्न सक्ने अनुमान छ।
हिमाली तथा पहाडी क्षेत्रका केही स्थानमा गर्जन/चट्याङसहित मध्यम वर्षाको सम्भावना छ। बागमती, गण्डकी र लुम्बिनी प्रदेशका तराई भागमा पनि वर्षा हुनसक्नेछ। कोशी, बागमती र गण्डकी प्रदेशका पहाडी क्षेत्रका एक/दुई स्थानमा भारी वर्षा हुने महाशाखाले बताएको छ।
शुक्रबार रातिसम्म देशको मौसम बदली रहनेछ। कोशी, बागमती, गण्डकी र लुम्बिनी प्रदेशका पहाडी क्षेत्रका धेरै स्थानमा मध्यम वर्षा र गर्जन/चट्याङ चल्ने सम्भावना छ। साथै, ती प्रदेशका हिमाली, पहाडी र तराई क्षेत्रका एक/दुई स्थानमा भारी वर्षा पनि हुनसक्छ।
काठमाडौं उपत्यकामा दिन र रात दुवै समय मध्यम वर्षा र गर्जनको आँकलन छ। काठमाडौंको अधिकतम तापक्रम २९–३१ डिग्री र न्यूनतम २०–२२ डिग्री सेल्सियस रहनेछ। पोखरामा दिनको तापक्रम ३१–३३ डिग्री रहनेछ भने ६० प्रतिशत वर्षाको सम्भावना छ। जोमसोममा भने अधिकतम तापक्रम २३–२५ डिग्री मात्र रहनेछ।
महाशाखाका अनुसार देश मनसुनकै प्रभावमा रहेको छ र मनसुनको न्यून चापीय रेखा आफ्नो सामान्य स्थान आसपास रहेको छ। तसर्थ, आगामी दिनमा पनि मौसम बदली भइरहने सम्भावना छ।
