मकवानपुरको बस्तीपुरमा विद्यालयबाट घर फर्कँदै गर्दा बाढीले बगाएर बेपत्ता भएकी अन्तिम बालिकाको शव शुक्रबार फेला परेको छ। तीन दिनपछि शव भेटिएको हो।
बस्तीपुर, हेटौडा उपमहानगरपालिका–१९ की ११ वर्षीया सुमित्रा भोलानको शव मनहरी गाउँपालिका–३ को लामीटारस्थित राप्ती नदीमा फेला परेको प्रहरीले जनाएको छ। उनी बगाएको स्थानबाट करिब ७ किलोमिटर तल शव भेटिएको हो। सुमित्रा तीकराम भोलानकी छोरी हुन्।
गत मंगलबार बासुदेव खोलामा आएको अचानक बाढीले विद्यालयबाट घर फर्कँदै गरेका चार बालिकालाई बगाएको थियो। उनीहरूमध्ये १३ वर्षीया सिमा भोलान भने उम्कन सफल भइन्। आठ वर्षीया रोशनी स्याङ्ताङको शव सोही दिन र १२ वर्षीया बिनिता भोलानको शव बिहीबार फेला परेको थियो।
घटनापछि नेपाल प्रहरी, सशस्त्र प्रहरी बल, स्थानीय जनप्रतिनिधि, विद्यालय प्रशासन र स्थानीय बासिन्दाको संयुक्त टोलीले खोजी जारी राखेको थियो।
विद्यालयबाट घर फर्किँदै गर्दा अचानक आएको बाढीले उनीहरूको यात्रा दुखद घटनामा परिणत भएको थियो। सुमित्राको शव भेटिएसँगै बाढीमा बगाएका चार बालिकामध्ये तीन जनाको मृत्यु भएको छ भने एक जना बाँचेकी छन्।
