६ भदौ, डोल्पा । जाजरकोट–डोल्पा जोड्ने भेरी करिडोर एक सातादेखि अवरुद्ध हुँदा डोल्पामा खाना पकाउने एलपी ग्याँस, पेट्रोल र डिजेलको अभाव देखिन थालेको छ।
जाजरकोटको नलगाड नगरपालिका–११ चौखास्थित तासुघाट खोलामा आएको बाढीले सडक कटान गरेपछि भेरी करिडोर पूर्ण रूपमा ठप्प भएको हो। बाढीले खोलामा राखिएको ह्युमपाइप र झोलुङ्गे पुलमा समेत क्षति पुर्याएको छ।
सडक सञ्चालनमा नआएपछि डोल्पातर्फ जाने मालवाहक र यात्रुवाहक सवारीसाधन बाटोमै रोकिएका छन्। यात्रुहरू भने जोखिम मोलेर तुईन चढी आवतजावत गर्न बाध्य छन्। सडक अवरुद्ध भएसँगै डोल्पामा दैनिक उपभोग्य वस्तुको आपूर्ति पनि प्रभावित भएको छ।
जिल्ला प्रशासन कार्यालय डोल्पाका अनुसार बजारमा रहेको मौज्दात घट्दै गएपछि ग्याँस तथा पेट्रोलियम पदार्थको अभाव सुरु भएको हो। प्रमुख जिल्ला अधिकारी जुनु हमाल ढकालले सडक अवरुद्ध हुनुअघि जिल्लामा यस्तो अभाव नरहेको बताइन्। उनका अनुसार सडक बन्द भएपछि मात्र आपूर्ति रोकिएको हो। सडक सञ्चालनमा आएलगत्तै ग्याँस र पेट्रोलियम पदार्थ बोकेका सवारी डोल्पा भित्रिने र अभाव क्रमशः कम हुने उनको भनाइ छ।
होटल व्यवसायदेखि गाउँघरसम्म प्रभाव
ग्याँसको अभाव सुरु भएपछि डोल्पाका मुख्य बजारमा सञ्चालित होटल व्यवसाय प्रभावित भएका छन्। त्रिपुरासुन्दरी नगरपालिका–१ त्रिपुराकोट बगरमा होटल सञ्चालन गर्दै आएका नरेश गुरुङले ग्याँस नपाउँदा ग्राहकलाई सेवा दिन नसकिएको बताए। ग्याँस अभावका कारण आएका ग्राहक फर्काउनुपरेको र व्यवसायमा घाटा भइरहेको उनको भनाइ छ।
बजारमा मात्र नभई गाउँघरमा समेत ग्याँस अभाव हुन थालेपछि सर्वसाधारण थप मारमा परेका छन्। प्रशासनका अनुसार सडक लामो समयसम्म सञ्चालनमा नआए ग्याँस र इन्धनसँगै खाद्यान्न, निर्माण सामग्रीलगायत अत्यावश्यक वस्तुको आपूर्तिमा थप समस्या आउन सक्छ।
सांसदको ध्यानाकर्षण र मर्मत प्रयास
सडक लामो समय अवरुद्ध भएपछि प्रतिनिधिसभा सदस्य धनबहादुर बुढाले भेरी करिडोर तत्काल सञ्चालनमा ल्याउन सरकारको ध्यानाकर्षण गराएका छन्। प्रतिनिधिसभाको बैठकमा बोल्दै उनले भेरी करिडोरलाई डोल्पालीको जीवनरेखा भन्दै अवरुद्ध सडकले जिल्लावासीले ठूलो सास्ती खेप्नु परेको बताए। अस्थायी पुनर्निर्माण गरेर भए पनि सडक छिटो खुलाउन उनले आग्रह गरे।
यसैबीच, अवरुद्ध भेरी करिडोरको जाजरकोटतर्फ चौखास्थित तासुघाट खण्ड खुलाउने काम अन्तिम चरणमा पुगेको छ। गत बिहीबार राति अविरल वर्षापछि तासुघाट खोलामा पानीको बहाव बढ्दा झोलुङ्गे पुल र ह्युमपाइपमा क्षति पुगेको थियो। भेरी करिडोर कार्यालयका अनुसार क्षतिग्रस्त सडकको मर्मत तथा पुनःनिर्माण तीव्र गतिमा भइरहेको छ। चौखामा पैदल यात्रु र मोटरसाइकल आवतजावत गर्न मिल्ने गरी बाटो तयार भइसकेको छ भने सवारीसाधन पूर्ण रूपमा चलाउन थप काम जारी छ।
भेरी करिडोर डोल्पाको मुख्य आपूर्ति मार्ग हो। वर्षायाममा बाढी, पहिरो र खोलानालाको बहाव बढ्दा करिडोरका विभिन्न स्थानमा पटक–पटक सडक अवरुद्ध हुँदै आएको छ। सडक बन्द हुँदा डोल्पालीले सवारी फेरेर यात्रा गर्नुपर्ने, ढुवानीमा थप खर्च बेहोर्नुपर्ने र बजारमा दैनिक उपभोग्य वस्तुको मूल्य बढ्ने समस्या भोग्दै आएका छन्।
स्थानीयवासीले वर्षायाम सुरु भएसँगै भेरी करिडोर अवरुद्ध हुने समस्याको दीर्घकालीन समाधान गर्न माग गरेका छन्। उनीहरूले जोखिमयुक्त स्थानमा स्थायी सडक संरचना निर्माण र आवश्यक ठाउँमा पुल बनाउन सरकारसँग आग्रह गरेका छन्।
मर्मतको काम अन्तिम चरणमा पुगे पनि सडक पूर्ण रूपमा सञ्चालनमा नआएसम्म डोल्पामा ग्याँस तथा पेट्रोलियम पदार्थको आपूर्ति सहज हुने देखिँदैन। बाटो खुलेपछि रोकिएका मालवाहक सवारीसाधन डोल्पा भित्रिएसँगै देखिएको अभाव कम हुने अपेक्षा डोल्पाबासीको छ।
