जाजरकोटको नलगाड नगरपालिका–१० र ११ को सीमामा पर्ने ताक्सुगाडमा बाढीले बगाएको भेरी करिडोरको सडकखण्ड नौ दिनपछि पुनः सञ्चालनमा आएको छ। सडक मर्मतपछि जाजरकोटबाट डोल्पातर्फ लाग्ने सवारीसाधन चल्न थालेका हुन्।
बाढीले ताक्सुगाड क्षेत्रको सडकसँगै पुल र चारवटा घर बगाएको थियो। त्यसपछि जाजरकोट–डोल्पा सडकखण्डमा यातायात पूर्ण रूपमा ठप्प भएको थियो। दैनिक उपभोग्य सामग्री बोकेका सवारीसाधन र यात्रुहरू बाटोमै रोकिनु परेको थियो।
नलगाड नगरपालिकाको समन्वयमा भेरी करिडोर सडक योजनाले तत्काल मर्मत गरेपछि सडक सञ्चालनमा आएको हो। सडक खुलेसँगै जाजरकोटबाट डोल्पाका त्रिपुराकोट, छलगाडलगायत क्षेत्रमा गाडी चल्न थालेका छन्। लामो समयदेखि अवरुद्ध सडक खुलेपछि सास्ती खेप्नु परेका यात्रु तथा स्थानीयलाई केही राहत मिलेको नलगाड–१२ का तेजबहादुर विकले बताए।
बाढीको असर सडक र पुलमा मात्रै परेको छैन। रोली ज्यूलाको सिँचाइ नहर पनि बाढीले क्षतिग्रस्त बनाएको छ, जसले स्थानीयको सिँचाइ सुविधामा समस्या ल्याएको छ। नहर पुनर्निर्माणका लागि लागत अनुमान तयार पारी प्रदेश सरकारको खानेपानी, सिँचाइ तथा ऊर्जा विकास कार्यालयमार्फत काम गर्ने तयारी रहेको नगरप्रमुख डम्बर रावतले जानकारी दिए।
क्षतिग्रस्त संरचनाको तत्काल मर्मतका साथै दीर्घकालीन रूपमा सुरक्षित पूर्वाधार निर्माण गर्नुपर्ने उनको भनाइ छ। वर्षायाममा पानीको बहाव बढेपछि सडक र नहरमा पटकपटक क्षति हुने भएकाले बाढीको जोखिमलाई ध्यान दिएर संरचना बनाउनुपर्ने नगरपालिकाको धारणा छ।
जोखिम अझै कायमै
ताक्सुगाडको सडक खुले पनि यसलाई पूर्ण रूपमा सुरक्षित मान्न सकिने अवस्था छैन। खोलामा पानीको मात्रा बढ्नासाथ सडक अवरुद्ध हुने क्रम दोहोरिने गरेको स्थानीय बताउँछन्। निरन्तर वर्षा भइरहेकाले माथिल्लो क्षेत्रमा पानी परेपछि ताक्सुगाड खोलामा एक्कासि बहाव बढ्ने गरेको छ।
भेरी करिडोरका विभिन्न खोलामा स्थायी पुल तथा कल्भर्ट निर्माण नहुँदा वर्षायाममा सवारीसाधन जोखिम मोलेरै चलाउनुपर्ने अवस्था छ। अहिले सडक सञ्चालनमा आए पनि ठूलो वर्षा भएमा पुनः अवरुद्ध हुनसक्ने जोखिम कायमै छ। सडक बन्द हुँदा डोल्पाका विभिन्न क्षेत्रमा खाद्यान्न, औषधि र दैनिक उपभोग्य सामग्रीको ढुवानी प्रभावित हुने गरेको छ।
छलगाडमा पुल नहुँदा यातायात अप्ठ्यारो
भेरी करिडोरले जाजरकोट र डोल्पालाई जोडे पनि छलगाडमा पुल नहुँदा नियमित यातायात सञ्चालनमा समस्या रहँदै आएको छ। खोलामा पानीको बहाव कम भएका बेला मात्रै जाजरकोटबाट त्रिपुराकोट हुँदै छलगाडसम्म गाडी चल्ने गरेका छन्।
छलगाडमा आवश्यक पुल नभएकाले वर्षायाममा डोल्पाको सदरमुकाम दुनैसम्म नियमित यातायात चलाउन कठिन छ। खोलामा बहाव बढेपछि सवारीसाधन रोकिने र यात्रुहरू पैदलै जोखिमपूर्ण रूपमा खोला पार गर्नुपर्ने अवस्था आउने गरेको छ।
भेरी करिडोर डोल्पाका नागरिकलाई प्रदेश राजधानी सुर्खेतसहित अन्य जिल्लासँग जोड्ने महत्वपूर्ण मार्ग हो। यो सडक अवरुद्ध हुँदा डोल्पाका अधिकांश क्षेत्रको दैनिक जीवन प्रभावित हुने गरेको छ। ताक्सुगाडसहित जोखिमयुक्त स्थानमा स्थायी संरचना निर्माण गर्न स्थानीयले माग गर्दै आएका छन्।
यस खण्डमा निर्माण हुनुपर्ने पाँचवटा पुलको काम भने अघि बढ्न सकेको छैन। क्याराभान हिराचन जेभीले २०७७ माघ २ गते नलगाड र झुर्मेखोलाको पक्की पुलका लागि १८ करोड ४३ लाख ४३ हजार रुपैयाँको ठेक्का सम्झौता गरेको थियो। सोही कम्पनीले त्रात्रखोला, मैदेखोला र ताक्सुगाड चौखाको १३ करोड ५४ लाखको ठेक्का लिए पनि ती पुलको निर्माण अहिलेसम्म सुरु भएको छैन।
भेरी करिडोर सडकको कुल लम्बाइ करिब ११८ किलोमिटर छ। यसले जाजरकोटसँगै डोल्पाका विभिन्न स्थानीय तहलाई सडक सञ्जालमा जोडेको छ। सडक निर्माण र स्तरोन्नतिबाट यातायात पहुँचमा सहजता भए पनि बाढीपहिरो र पुल अभावले नियमित सञ्चालन चुनौतीपूर्ण बनेको छ।
वर्षायाममा सडकका खोलाहरूमा बहाव बढ्दा यातायात बन्द हुने र हिउँदमा भने सडक सहज रूपमा सञ्चालन हुने गरेको छ। सडक अवरुद्ध हुँदा डोल्पामा खाद्यान्न, निर्माण सामग्री र औषधिको ढुवानीसमेत प्रभावित हुने गरेको छ।
ताक्सुगाडको सडक खुले पनि बाढीले क्षति पुर्याएका पुल, नहर र सडक संरचनाको स्थायी समाधान नभएसम्म वर्षायाममा यातायात अवरोध दोहोरिने देखिएको छ। दीर्घकालीन योजनासहित जोखिमयुक्त स्थानमा स्थायी पुल तथा सडक संरचना निर्माण गर्नुपर्ने स्थानीयको माग छ।
