गाईघाट, २४ अगस्ट । उदयपुरको त्रियुगा नगरपालिका–१० स्थित करमगाछीमा आइतबार दिउँसो मोटरसाइकलको ठक्करबाट एक साइकलयात्रुको मृत्यु भएको छ।
प्रहरीका अनुसार मृत्यु हुनेमा सोही वडाको एलाम्बर मार्गका ५८ वर्षीय सन्त बहादुर राई रहेका छन्। दुर्घटनामा टाउकोमा गम्भीर चोट लागेका उनको जिल्ला अस्पतालमा उपचारका क्रममा ज्यान गएको हो।
ठक्कर दिने मोटरसाइकलको नम्बर प्रदेश ३–०२–००४ प ०७७५ रहेको बताइएको छ। सोही मोटरसाइकलमा सवार १९ वर्षीय चालक त्रियुगा नगरपालिका–१२ का महमद साबिन रायन पनि घाइते भएका छन्। उनको अस्पतालमा उपचार भइरहेको छ।
प्रत्यक्षदर्शीका अनुसार बरुवा पुल हुँदै गाईघाटतर्फ जाँदै गरेको मोटरसाइकलले सोही दिशामा गइरहेको साइकललाई पछाडिबाट ठक्कर दिएको थियो।
दुर्घटनाका सम्बन्धमा प्रहरीले अनुसन्धान सुरु गरेको जनाएको छ।
