गुल्मीको चन्द्रकोट गाउँपालिका–३ भुल्केस्थित बार्जिङ सामुदायिक वनका सल्लाका रुख एकाएक ढल्न थालेपछि नजिकै रहेको थप्लुङ भुल्के बस्तीका ३० घरपरिवारले घर छाडी आफन्तकहाँ आश्रय लिन बाध्य भएका छन् ।
शनिबार दिउँसोदेखि नै वनमा छिटपुट सल्लाका रुख ढल्न सुरु भएका थिए । त्यसपछि बिस्तारै पहिरोका रूप लिँदै ठूलो परिमाणमा रुख ढलेकाले बस्तीमाथिको जोखिम बढेको हो ।
निरन्तरको वर्षाका कारण पहिरोले रुख ढाल्ने, ठूला ढुंगा खस्ने र पहिरो बस्तीसम्मै पुग्न सक्ने अवस्था रहेकाले स्थानीयलाई सुरक्षित स्थानतर्फ जान सुझाव दिइएको जिल्ला प्रहरी कार्यालय गुल्मीका प्रमुख प्रहरी उपरीक्षक भीमकिरण बोगटीले जानकारी दिए ।
रातको समयमा हुन सक्ने जोखिमलाई मध्यनजर गर्दै नजिकको बस्तीका बासिन्दालाई सुरक्षित स्थानमा सारिएको चन्द्रकोट गाउँपालिका अध्यक्ष युवराज केसीले बताए । बस्तीका स्थानीय आफैँ स्वतःस्फूर्त रूपमा आफन्त तथा छिमेकीकहाँ आश्रय लिएको र छुट्टै व्यवस्थापन गरिहाल्नुपर्ने अवस्था नरहेको उनको भनाइ छ ।
