काठमाडौं । कमलपोखरीस्थित एमटीआर आउटलेटमा अगस्ट २३ मा ‘तस्निम्स कुकआउट विथ एमटीआर’ कार्यक्रम आयोजना गरियो । सो कार्यक्रमले पाहुनालाई मावल्ली टिफिन रुम्स (एमटीआर) को समृद्ध पाक इतिहास र दक्षिण भारतीय शाकाहारी खानासँग नजिकबाट परिचित गराएको छ ।
ले शेर्पा कन्सेप्टले जारी गरेको विज्ञप्तिअनुसार कार्यक्रममा सहभागीहरूलाई एमटीआरका परम्परागत पकाउने विधि र विशेष परिकारबारे जानकारी दिइयो । यसले टेबलमा राखिएको खानालाई बेंगलुरुसँग जोडिने, एक शताब्दीभन्दा पुरानो पाक विरासतसँग जोडेको आयोजकले बताएको छ ।
कमलपोखरीको आउटलेट प्रामाणिक एमटीआर फ्रेन्चाइजका रूपमा सञ्चालित छ र यसले काठमाडौंमा पूर्ण रूपमा शाकाहारी दक्षिण भारतीय मेनु उपलब्ध गराउँदै आएको छ । विज्ञप्तिमा एमटीआरले आफ्नो परम्परागत रेसिपी र दक्षिण भारतीय पाक पहिचानलाई कायम राख्दै स्थानीय बजारमा फरक शाकाहारी भोजन अनुभव ल्याएको उल्लेख छ ।
नेपालमा एमटीआरको उपस्थिति राजधानीमा मात्र सीमित छैन । मुक्तिनाथमा पनि एमटीआरको उपस्थिति रहेको छ, जहाँ तीर्थयात्री र यात्रुहरूलाई दक्षिण भारतीय शाकाहारी खाना उपलब्ध गराइन्छ । विज्ञप्तिअनुसार एमटीआर नेपालमा ले शेर्पा कन्सेप्टअन्तर्गत सञ्चालित छ । उपत्यकाभित्र नौवटा आतिथ्य तथा खाद्य परियोजनाहरू सञ्चालन गर्ने यो समूहले गुणस्तर, दिगोपन र मानिसहरूलाई जोड्ने स्थान सिर्जना गर्नमा आफ्नो ध्यान केन्द्रित रहेको बताउँछ ।
समूहका होटल, रेस्टुरेन्ट तथा क्याफेहरू विचारपूर्ण डिजाइन, जिम्मेवार अभ्यास र अर्थपूर्ण पाहुना अनुभवलाई प्राथमिकतामा राखेर सञ्चालित रहेको विज्ञप्तिमा जनाइएको छ ।
