विश्वकै एकमात्र शालिग्राम नदीका रूपमा चिनिने कालीगण्डकीमा वर्षायामको कानुनी प्रतिबन्धलाई चुनौती दिँदै राति अवैध उत्खनन भइरहेको छ। बागलुङ र पर्वतका विभिन्न स्थानमा भारी मेसिन प्रयोग गरेर बालुवा तथा ढुङ्गा निकालिने गरेको स्थानीयवासीले बताएका छन्।
नदीजन्य पदार्थको उत्खननमा वर्षायाममा कानुनी रोक छ। तर, प्रतिबन्धकाबीच पनि मध्यरातमा ठूला उपकरण परिचालन गरेर उत्खनन हुने गरेको स्थानीयवासीको आरोप छ। उनीहरूका अनुसार यस्तो कार्यमा प्रहरीले कुनै चासो नदेखाएर मौन बसेको छ।
कालीगण्डकीको बहाव नै परिवर्तन हुँदै गएपछि नदी किनारको माझी बस्ती जोखिममा परेको छ। अत्यधिक उत्खननकै कारण नदीको किनार कमजोर बन्दै गएको र बस्तीतर्फ पानी बढ्दै गएको स्थानीयवासीको भनाइ छ।
