काठमाडौं — एनसेलका ग्राहकहरूले अब नेपाल मेडिसिटी अस्पतालमा निःशुल्क वा छुटमा बिरामी जाँच (ओपीडी) सेवा पाउने भएका छन्। दूरसञ्चार सेवाप्रदायक एनसेल र अस्पतालबीच भएको नयाँ साझेदारीअनुसार ग्राहकले यो सुविधा प्राप्त गर्नेछन्।
नयाँ व्यवस्थाअनुसार रु २९९ वा सोभन्दा बढीको सक्रिय प्याक वा रेन्टल भएका एनसेल ग्राहकहरूले ओपीडीमा निःशुल्क चिकित्सक परामर्श पाउनेछन्। त्यस्तै, रु ९९ देखि रु २९९ भन्दा कमको सक्रिय प्याक वा रेन्टल भएका ग्राहकहरूले ओपीडी परामर्श शुल्कमा २० प्रतिशत छुट पाउनेछन्।
मंगलबार भएको सम्झौतामा एनसेलका प्रमुख ग्राहक व्यवसाय अधिकृत उपाङ्ग दत्त र नेपाल मेडिसिटी अस्पतालका प्रमुख कार्यकारी अधिकृत डा. अमित टोमरले हस्ताक्षर गरेका छन्।
योग्य ग्राहकहरूले एनसेल एपको ‘साझेदार सेवा’ खण्डमा गएर नेपाल मेडिसिटी अस्पताल खोजी गरेपछि यो सुविधा लिन सक्नेछन्। योग्य ग्राहकलाई सम्बन्धित सुविधा स्वतः प्रदर्शित हुने व्यवस्था गरिएको छ।
एनसेलका अनुसार योग्य प्याक वा रेन्टल नभएका ग्राहकहरूले पनि प्याक सक्रिय गरेर यो सुविधा प्राप्त गर्न सक्नेछन्।
साझेदारीले मोबाइल कनेक्टिभिटीभन्दा बाहिर पनि ग्राहकलाई लाभ प्रदान गर्ने उद्देश्य राखेको दत्तले बताए। यस्तो सहकार्यले स्वास्थ्य सेवालाई थप सुलभ र किफायती बनाउन मद्दत पुर्याउने टोमरले बताए।
