अमेरिकी राजदूतावास काठमाडौंले अमेरिकी कन्ट्री गायिका तथा गीतकार जेसिका लिनलाई नेपाली संगीतकर्मीसँग व्यावसायिक सिकाइ आदानप्रदानका लागि नेपाल ल्याएको छ। अगस्ट २४ देखि २९ सम्म चल्ने उक्त कार्यक्रममा उनले नेपाली संगीतकर्मी र संगीत उद्योगका पेशाकर्मीसँग भेटघाट गर्नेछिन्।
अमेरिकी विदेश विभागको शैक्षिक तथा सांस्कृतिक मामिला ब्यूरोको 'आर्ट्स एन्ड म्युजिक एन्भोय प्रोग्राम'अन्तर्गत आयोजना गरिएको यो कार्यक्रममा नेपाली गायक, गायिका, संगीतकार, गीतकार, प्रोड्युसर, कलाकार व्यवस्थापकलगायत संगीत उद्योगसँग सम्बन्धित व्यक्तिहरूको सहभागिता रहनेछ।
कार्यक्रममा गीत लेखन, संगीत व्यवसाय, डिजिटल प्लेटफर्म, प्रतिलिपि अधिकार र संगीत उद्योगका अन्य पक्षहरूबारे छलफल हुनेछ।
अमेरिकी चार्जे डी अफेयर्स स्कट अर्बोमले यस कार्यक्रमले अमेरिकी र नेपाली कलाकारबीच व्यावसायिक सम्बन्ध सुदृढ बनाउन तथा नेपालको संगीत क्षेत्रको सिर्जनशीलता र वृद्धिमा सहयोग पुर्याउने विश्वास व्यक्त गरे।
कार्यक्रमको समापनमा अगस्ट २९ मा पुल्चोकस्थित द प्लाजामा सार्वजनिक कन्सर्ट आयोजना हुनेछ। उक्त कन्सर्टमा जेसिका लिन, नेपाली कलाकार रातो रानी र उजन शाक्यको प्रस्तुति रहनेछ भने लिन र सारङ्गीवादक किरण नेपालीबीचको फ्युजन प्रस्तुति पनि रहनेछ। किरण नेपाली अमेरिकी सरकारको आदानप्रदान कार्यक्रमका पूर्व सहभागी हुन्।
