रसुवाको भोटेकोशी नदीमा भदौ १० गते आएको बाढीपछि धुन्चेमा रोकिएका यात्रुलाई स्थलमार्गबाट उद्धार गर्ने काम थालिएको छ। बागमती प्रदेश सरकारले वैकल्पिक सडक हुँदै उनीहरूलाई काठमाडौँ उपत्यकासम्म पुर्याउने व्यवस्था मिलाएको हो।
धुन्चेमा अलपत्र परेका तीर्थयात्री, पर्यटक र सर्वसाधारणलाई सुरक्षित रूपमा काठमाडौँ ल्याउन मुख्यमन्त्री किरण थापा मगरले समन्वय गरेका थिए। मुख्यमन्त्री थापाका अनुसार धुन्चेमा रोकिएकाहरूलाई त्यहीं खाना खुवाउने व्यवस्था गरिएको छ।
उनले भनेका अनुसार खाना खाइसकेपछि यात्रुलाई मोटरमार्फत महावीरसम्म पुर्याइने र महावीरबाट करिब एक घण्टा पैदल हिँडेर चौगटी पुग्ने गरी मार्ग तय गरिएको छ। चौगटीबाट पुनः सवारीसाधनमार्फत काठमाडौँ पठाउने योजना छ। उद्धारको पर्खाइमा रहेकाहरूका लागि प्रदेश सरकारले निःशुल्क बसको व्यवस्था गरेको छ।
धुन्चे र चौगटी दुवै ठाउँमा खानाको प्रबन्ध प्रदेश सरकारले नै मिलाएको मुख्यमन्त्रीले बताए। साथै त्रिशूली पारिको क्षेत्रमा अवरुद्ध मध्यपहाडी लोकमार्ग मर्मत गरेर यातायात सुचारु गर्ने प्रयास पनि थालिएको छ। यो मार्ग सञ्चालनमा आएपछि रसुवालगायत प्रभावित क्षेत्रका सर्वसाधारणले वैकल्पिक रूपमा सोही बाटो हुँदै काठमाडौँ आउन सक्ने जनाइएको छ।
सडक सञ्जाल पुनः सुचारु
भोटेकोशीमा बुधबार बिहान आएको अचानक बाढीले अवरुद्ध पारेको रसुवाको सडक सञ्जाल भने पुनः सञ्चालनमा आएको छ। राष्ट्रिय विपद् जोखिम न्यूनीकरण तथा व्यवस्थापन प्राधिकरणका अनुसार काठमाडौँ–टोखा–छहरे–गड्खारपुल–आप्र–नर्जा–लच्याङ–सरमथली–पाटीखर्क–बोगटीटार–कालिकास्थान–धुन्चे सडकखण्डमा साना चारपाङ्ग्रे सवारीसाधन सञ्चालन हुन थालेका छन्।
यससँगै रसुवा पुनः सडक सञ्जालमा जोडिएको प्राधिकरणले जनाएको छ। सडक सम्पर्क स्थापित भएपछि बाढी प्रभावित क्षेत्रमा राहत, उद्धार तथा अत्यावश्यक सामग्री पुर्याउन सहज हुने अपेक्षा गरिएको छ।
