नेपालबाट मनसुन पूर्ण रूपमा फिर्ता भएको छ। जल तथा मौसम विज्ञान विभागका अनुसार मनसुन औसतभन्दा १२ दिन ढिलो गरी अक्टोबर १४ मा देशभरबाट बाहिरिएको हो।
विभागले बुधबार सार्वजनिक गरेको मनसुन फिर्ता बुलेटिन–२ अनुसार अक्टोबर ३ मा सुदूरपश्चिम, कर्णाली, पश्चिम लुम्बिनी र पश्चिम गण्डकी प्रदेशका केही भागबाट मनसुन फिर्ता हुन थालेको थियो। त्यसयता क्रमशः अन्य भूभागबाट पनि मनसुन बाहिरिँदै अक्टोबर १४ मा देशभरको प्रक्रिया टुंगिएको विभागले जनाएको छ।
नेपालमा मनसुन फिर्ता हुने औसत मिति अक्टोबर २ हो। यस वर्ष त्यसभन्दा १२ दिनपछि मात्र मनसुन पूर्ण रूपमा बाहिरिएको हो।
मनसुन फिर्ता भए पनि स्थानीय तथा पश्चिमी वायुको प्रभाव कायमै रहन सक्ने भन्दै विभागले मौसमसम्बन्धी नवीनतम जानकारी नियाल्न आमजनता तथा सम्बन्धित निकायलाई आग्रह गरेको छ।
हिमाल र पहाडमा वर्षा–हिमपात
बिहीबार बिहान ८ बजे जारी गरिएको २४ घण्टे पूर्वानुमानअनुसार हिमाली क्षेत्र सामान्यतया बदली रहनेछ भने गण्डकी, लुम्बिनी, कर्णाली र सुदूरपश्चिम प्रदेशका पहाडी भागमा पनि सामान्य बदलीको अवस्था रहनेछ। कोशी र बागमती प्रदेशका पहाडी भागमा भने आंशिक बदली हुने अनुमान छ।
लुम्बिनी र सुदूरपश्चिमका तराई भागमा आंशिक बदली रहने तथा अन्य अधिकांश तराई क्षेत्रमा मौसम प्रायः सफा रहने पूर्वानुमान विभागले गरेको छ।
हिमाली क्षेत्रका थोरै स्थानमा तथा गण्डकी, लुम्बिनी, कर्णाली र सुदूरपश्चिम प्रदेशका पहाडी भागका एक–दुई स्थानमा मेघगर्जन र चट्याङसहित मध्यम वर्षा वा हिमपात हुन सक्छ। कोशी र बागमती प्रदेशका हिमाली तथा पहाडी भागका एक–दुई स्थानमा भने मेघगर्जन र चट्याङसहित हल्का वर्षा वा हिमपातको सम्भावना रहेको विभागले जनाएको छ।
देश अहिले पश्चिमी वायुको आंशिक प्रभावमा छ। पश्चिमी न्यून चापीय प्रणालीको प्रभाव बिहीबार र शुक्रबारसम्म कायम रहने विभागको भनाइ छ।
तराईमा बिहान कुहिरो
बिहीबार रातिका लागि जारी पूर्वानुमानअनुसार हिमाली क्षेत्र सामान्यतया बदली तथा पहाडी क्षेत्र आंशिक बदली रहनेछ। हिमाली क्षेत्रका एक–दुई स्थानमा हल्का वर्षा वा हिमपात हुन सक्छ। बागमती, गण्डकी, लुम्बिनी र सुदूरपश्चिम प्रदेशका तराईका केही भागमा बिहान कुहिरो लाग्ने सम्भावना छ।
काठमाडौंमा आंशिक बदली रहनेछ, जहाँ अधिकतम तापक्रम २५–२७ डिग्री सेल्सियस र न्यूनतम १३–१५ डिग्री सेल्सियस रहने पूर्वानुमान छ। पोखरामा भने मेघगर्जनसहित हल्का वर्षा हुन सक्छ; त्यहाँ दिनको तापक्रम २८–३० र रातको १५–१७ डिग्री सेल्सियस रहनेछ।
नेपालगन्ज, सिमरा, विराटनगर र जनकपुरमा दिनको तापक्रम ३२–३४ डिग्री सेल्सियस पुग्ने अनुमान छ। जुम्लामा दिनको २१–२३ र रातको ४–६ डिग्री सेल्सियस तथा जोमसोममा दिनको १४–१६ र रातको ४–६ डिग्री सेल्सियस रहने विभागले जनाएको छ।
