प्रतिनिधिसभाका सभामुख डोलप्रसाद अर्यालले यस वर्षको मनसुन सुरु भएपछि बढ्दै गएका बाढी, पहिरो तथा डुबानजस्ता विपद्जन्य घटनाहरूको पूर्वतयारी, राहत र उद्धार कार्यमा प्रभावकारिता ल्याउन सरकारको ध्यानाकर्षण गराएका छन्। उनले सरकारलाई दोस्रो पटक रुलिङ गर्दै मानवीय तथा भौतिक क्षति न्यूनीकरण गर्न तत्काल कदम चाल्न आग्रह गरेका हुन्।
सभामुख अर्यालले मंगलबारको बैठकमा सरकारको ध्यानाकर्षण गराउँदै मनसुनजन्य विपद्का घटनाहरू बढिरहेको औंल्याए। उनले बाढी, पहिरो र डुबानका कारण हुन सक्ने मानवीय तथा भौतिक क्षति कम गर्न प्रभावकारी पूर्वतयारी, राहत र उद्धारका साथै सुरक्षित यातायात व्यवस्थापन मिलाउन सरकारलाई आग्रह गरे।
यो सभामुख अर्यालले सरकारलाई गरेको दोस्रो रुलिङ हो। यसअघि असार २२ गते पनि उनले सभाको आकस्मिक र शून्य समयमा सांसदहरूले उठाएका समसामयिक विषयहरूमा सरकारलाई जवाफ दिन रुलिङ गरेका थिए। सोही क्रममा उनले देशका विभिन्न भागमा बाढी, पहिरो र डुबानका कारण हुन सक्ने जनधनको क्षति नियन्त्रण तथा न्यूनीकरण गर्न र विपद् व्यवस्थापनका पूर्वतयारीका सम्बन्धमा भएका कामकारबाहीबारे सदनलाई जानकारी गराउन पनि सरकारलाई निर्देश गरेका थिए।
सभामुखको यस रुलिङले सरकारलाई मनसुनजन्य विपद्को जोखिमप्रति गम्भीर हुन र आवश्यक तयारीमा जुट्न थप दबाब परेको छ।
