धन तथा समृद्धिकी देवी महालक्ष्मीको पूजा-आराधना गर्दै आज देशभर कोजाग्रत पूर्णिमा मनाइँदै छ । यसै पर्वसँगै बडादशैंको १५ दिने अवधि पनि टुंगिएको छ ।
परम्पराअनुसार भक्तजनले आज साँझ आ-आफ्ना घरमा महालक्ष्मीको पूजा गरी रातभर जागा बस्ने गर्छन् । महालक्ष्मी संसारतिर आएर कसले जाग्राम बसेको छ भनी हेर्ने र जागा बस्नेलाई आशीर्वाद दिने धार्मिक विश्वाससँग यो पर्व जोडिएको छ ।
नेपाल पञ्चाङ्ग निर्णायक समितिका अध्यक्ष डा पुरुषोत्तम भट्टराईका अनुसार आजैबाट दशैंको टीका तथा जमरा दिने र लिने क्रम अन्त्य हुन्छ । घटस्थापनाका दिन राखी अभिषेक गरिएको जमरा धार्मिक परम्पराअनुसार विसर्जन गरिन्छ ।
कोजाग्रत पूर्णिमाका अवसरमा भक्तजनले स्वयम्भू चैत्यमा पनि पूजा-अर्चना गर्ने र महादीप प्रज्वलन गर्ने गरेका छन् ।
समितिबाट स्वीकृत पात्रोअनुसार सोमबारदेखि कार्तिक स्नान सुरु हुनेछ र सोही दिनदेखि तुलसीको विशेष पूजा पनि आरम्भ हुनेछ । सोमबार साँझैबाट आकाशदीप प्रज्वलनको कार्यक्रम पनि सुरु हुने समितिले जनाएको छ ।
