एनआईसी एसिया बैंकका ग्राहकले नगरकोटस्थित होटल कन्ट्री भिल्लामा सेवा उपयोग गर्दा विभिन्न सेवामा १० प्रतिशतसम्मको छुट पाउने भएका छन् । यसका लागि बैंक र होटलबीच समझदारीपत्रमा हस्ताक्षर भएको बैंकले जारी गरेको विज्ञप्तिमा जनाइएको छ ।
समझदारीपत्रमा बैंकतर्फबाट ट्रान्जेक्सन बैंकिङ प्रमुख पुजनलाल अमात्य र होटलतर्फबाट फाइनान्स हेड सुरेन्द्र होराले हस्ताक्षर गरेका छन् ।
समझदारीअनुसार बैंकका ग्राहकले होटलको आवासीय सेवा तथा खाना र पेय पदार्थ उपयोग गर्दा छुट सुविधा लिन सक्नेछन् । डिलक्स वर्गका विभिन्न कोठामा बस्दा शुक्रबार र शनिबार ५ प्रतिशत छुट पाइने विज्ञप्तिमा उल्लेख छ ।
खाना तथा पेय पदार्थमा भने १० प्रतिशत छुट दिइने बैंकले जनाएको छ । सप्ताहन्तबाहेक अन्य दिनमा आवासीय र खानपान दुवै सेवामा १० प्रतिशत छुट उपयोग गर्न सकिने विज्ञप्तिमा भनिएको छ ।
छुटको दायरा सेवा र दिनअनुसार फरक पर्ने भएकाले ग्राहकले होटलमा सेवा लिनुअघि उपलब्ध सुविधाबारे जानकारी लिन सक्नेछन् ।
