नेपाली कांग्रेसका प्रवक्ता देवराज चालिसेले पार्टी सभापति गगनकुमार थापाको विशेष आग्रहपछि १५औँ महाधिवेशनमा उपसभापति पदमा दिएको उम्मेदवारी फिर्ता लिएको घोषणा गरेका छन्। सामाजिक सञ्जाल फेसबुकमार्फत उनले यो जानकारी दिएका हुन्।
पार्टीका लागि काम गर्ने उद्देश्यले उपसभापति पदमा उम्मेदवारी दिएको उल्लेख गर्दै चालिसेले सभापति थापाको आग्रहलाई सम्मान गर्दै मनोनयन फिर्ता गरेको बताएका छन्। देशभरका साथीहरूबाट उम्मेदवारीका क्रममा पाएको माया, विश्वास, समर्थन र हौसलाप्रति उनले आभार व्यक्त गरेका छन्।
आफ्नो निर्णयबाट धेरै साथीहरूले आश्चर्य व्यक्त गर्दै असन्तुष्टि जनाएको उल्लेख गर्दै उनले त्यसका लागि क्षमा मागेका छन्। यो निर्णय पार्टीको एकता, संस्थागत मर्यादा र सामूहिक हितलाई ध्यानमा राखेर गरिएको उनको भनाइ छ। निर्णय न त निर्वाचन लक्षित छ न व्यक्ति लक्षित, यसमा साथीहरू स्वतन्त्र रहेको पनि उनले स्पष्ट पारेका छन्।
पार्टी प्रणालीमा सभापतिको राजनीतिक निर्णयको सम्मान गर्नु आफ्नो कर्तव्य ठानेर यो निर्णय लिएको चालिसेले बताएका छन्। पार्टीका लागि केही गर्ने भनेर भूमिका खोजिएको र कुनै पनि भूमिका अन्तिम नहुने उनको भनाइ छ। भूमिका आफैँले रोज्नेभन्दा पार्टीले आवश्यकता अनुसार जिम्मेवारी दिने प्रणालीले पार्टी प्रणालीलाई बलियो बनाउने उनले उल्लेख गरेका छन्।
पार्टीका जिम्मेवारी प्रतिष्ठाभन्दा परिणामसँग जोडिएका विषय भएको उनको भनाइ छ। सामूहिक शक्ति र एकताबद्ध प्रयासबाट मात्र पार्टीलाई सुदृढ बनाउन सकिने उनले बताएका छन्। साथीहरूको विश्वास र सद्भावप्रति गहिरो सम्मान रहेको पनि उनले जनाएका छन्।
