नेपाली कांग्रेसको केन्द्रीय निर्वाचन समितिले उपसभापति र महामन्त्री पदको मतगणना सुरु गर्नुअघि ती पदका उम्मेदवारहरूसँग छलफल गरिरहेको छ । मतगणनाका सन्दर्भमा आवश्यक परामर्श गर्न समितिले उम्मेदवारहरूलाई बैठकमा बोलाएको हो ।
सानेपामा सुरु भएको बैठकमा उपसभापति र महामन्त्री पदका उम्मेदवार मात्र सहभागी रहेको बताइएको छ । उनीहरूसँगको छलफल टुंगिएलगत्तै मतगणनामा जाने तयारी समितिको छ ।
सभापति पदको गणना सम्पन्न
निर्वाचन समितिले यसअघि शुक्रबार राति सभापति पदका लागि भएको मतदानको गणना राष्ट्रिय सभागृहमा सम्पन्न गरेको थियो । सोही गणनामा थापाले प्रतिस्पर्धी उम्मेदवार श्यामकृष्ण खड्गीलाई पराजित गर्दै सभापतिमा निर्वाचित भए ।
थापाले ६ हजार ५८४ मत पाएका छन् भने खड्गीले ३७५ मत मात्र प्राप्त गरेका छन् ।
सभापति पदको परिणाम सार्वजनिक भइसकेकाले अब अन्य पदाधिकारीको मतगणना प्रक्रिया अगाडि बढ्नेछ । उम्मेदवारहरूसँगको परामर्श सकिएपछि गणना थाल्ने समितिको तयारी छ ।
