संवेदनशील सूचना चुहाएको आरोपमा गृह मन्त्रालयले सेवाबाट बर्खास्त गरेका सशस्त्र प्रहरी बलका एआईजी वंशीराज दाहालले कानुनी परामर्श सुरु गरेका छन् । बर्खास्तीको आधिकारिक जानकारी गृह मन्त्रालयले २३ असोज साँझ विज्ञप्तिमार्फत सार्वजनिक गरेको थियो । सुरक्षा निकायमा लामो सेवा अवधि बिताएका दाहालले पद गुमाएपछि कानुनी परामर्शतर्फ रुचि देखाएका हुन् ।
दाहाल निकट स्रोतका अनुसार उनले कानुनी परामर्श थालिसकेका छन् र आगामी दिनमा कसरी अघि बढ्ने भन्ने विषयमा उनैले निर्णय गर्नेछन् ।
गृह मन्त्रालयका प्रवक्ता आनन्द काफ्लेद्वारा हस्ताक्षरित विज्ञप्तिअनुसार दाहाललाई सेवाबाट हटाउनेगरी विभागीय कारबाही गरिएको छ र यो कारबाही २३ असोजकै मितिबाट लागू हुन्छ । यसअघि १९ असोजमा उनलाई संवेदनशील सूचना चुहावट तथा आचरणविपरीत कार्य गरेको आरोपमा पदबाट निलम्बन गरिएको थियो । तर कस्तो प्रकृतिको सूचना चुहिएको हो भन्ने विषय बर्खास्तीको निर्णयमा समेत खुलाइएको छैन ।
सूचना चुहावटको अभियोगमा एआईजी तहको अधिकृत बर्खास्तीमा पर्ने यो घटना सशस्त्र प्रहरी बल र नेपाल प्रहरीको इतिहासमै पहिलो रहेको जानकारहरू बताउँछन् ।
अवकाश नजिकिँदै गर्दा बर्खास्ती
दाहाल बर्खास्तीअघि सशस्त्र प्रहरी बलको सीमा विभाग प्रमुखको जिम्मेवारीमा कार्यरत थिए । २८ असोजमा अवकाशमा जाने तयारीमा रहेका उनको सेवा अवधि एक वर्ष थप गर्न सकिने प्रावधानअनुसार म्याद थपका लागि सिफारिससमेत भएको थियो । सोही क्रममा बर्खास्तीको निर्णय आएको हो ।
चोलेन्द्र प्रकरणसँग जोडिएको आधार
बर्खास्तीको पछाडि विवादित व्यक्तिसँगको सम्बन्ध, हिरासतमा रहेका पूर्वप्रधानन्यायाधीश चोलेन्द्र शमशेर जबरालाई भेट्न जानु र सूचना चुहावटका विषयलाई आधार मानिएको छ ।
१० असोज मध्यरातमा प्रहरी पूर्वप्रधानन्यायाधीश चोलेन्द्र शमशेर जबराको घर पुगेको थियो । काठमाडौं उपत्यका अपराध अनुसन्धान कार्यालयको टोलीले ११ असोज बिहानीपख २ बजे उनलाई आफ्नै कार्यालयमा ल्याएको थियो । त्यसको करिब एक घण्टापछि एआईजी दाहाल चोलेन्द्रलाई भेट्न टेकुस्थित सोही कार्यालयमा पुगेका थिए ।
चोलेन्द्रलाई कार्यालयमा १२ घण्टासम्म राखिएको अवधिमा उनको मोबाइलका गतिविधि प्रहरी अधिकारीले नियालेका थिए । अस्वाभाविक भेटघाट र चलखेलको सूचना पाएपछि उनी सरकारको निगरानीमा परेका थिए । सम्पत्ति शुद्धीकरण, बीमा, धितोपत्र र बैंकिङ कसुरमा पक्राउ परी पुर्पक्षका लागि कारागारमा रहेका व्यवसायी दीपक भट्टदेखि सुलभ अग्रवालसम्मका मुद्दामा समेत चलखेल गर्न लागेको जानकारी पाइएपछि प्रहरीले उनलाई नियन्त्रणमा लिएर केरकार गरेको थियो ।
इनम सापकोटा जोडिएको दाबी
चोलेन्द्रको मोबाइलका गोप्य विवरण तथा सन्देश जाँचिएपछि थप पाटा खुलेका थिए, जसले इनम सापकोटा नामका व्यक्तितर्फ संकेत गरेको थियो । नेपाल प्रहरीको विशेष ब्युरोले दिल्ली जान लागेका बेला इनमलाई त्रिभुवन अन्तर्राष्ट्रिय विमानस्थलबाट केही दिनअघि पक्राउ गरेको थियो । उनलाई एक दिन हिरासतमा राखेर अनुसन्धान गरिएको स्रोत बताउँछ । अहिले इनम जिल्ला प्रहरी परिसर काठमाडौंको हिरासतमा रहेका छन् र सम्पत्ति शुद्धीकरणको कसुरमा अनुसन्धान अघि बढाइएको छ ।
इनमसँग बारम्बार सम्पर्क भएको देखिएपछि एआईजी दाहाल सरकारको निगरानी सूचीमा परेका थिए । स्रोतका अनुसार पक्राउ परी अनुसन्धानमा रहेका बिचौलियासँग बहालवाला एआईजीको सम्पर्क मात्रै नभई गोप्य तथा संवेदनशील सूचना आदानप्रदान भएको विषय पनि भेटिएको छ । इनमको पूर्वप्रधानन्यायाधीश चोलेन्द्र, एआईजी दाहाल र अन्य केही सुरक्षा अधिकारीसँग पनि सम्बन्ध रहेको स्रोतको दाबी छ ।
विशेष ब्युरोले इनमको मोबाइल जाँचका क्रममा महत्वपूर्ण सूचना फेला परेको दाबी गरेको छ । उच्च स्रोतका अनुसार एआईजी दाहाल र इनमबीच प्रधानमन्त्री बालेन शाहका गतिविधिबारेको सूचनासमेत आदानप्रदान भएको देखिएको छ ।
