इरानका विदेशमन्त्री अब्बास अराघचीले युद्धलाई अब वातावरणको मौन पीडितका रूपमा मात्रै हेर्न नसकिने बताएका छन्। पछिल्ला वर्षहरूमा गाजा, लेबनान र इरानमा घटेका घटनाले सैन्य आक्रमणका कारण हुने मानवीय क्षति र महत्त्वपूर्ण पूर्वाधारको विनाशसँगै वातावरणमा पनि गहिरो र कहिलेकाहीँ दीर्घकालीन असर पर्ने देखाएको उनको भनाइ छ।
गाजाको सन्दर्भमा उनले वातावरणीय क्षतिको मात्रा यति ठूलो भइसकेको बताए, जसलाई संयुक्त राष्ट्रसंघीय वातावरण कार्यक्रमले अभूतपूर्व भनेर वर्णन गरेको छ। वातावरणीय विपत्तिको अवस्था भयावह बनेको उनको भनाइ छ।
यसैगरी लेबनानमा हतियारको प्रयोग र आक्रमणका क्रममा लागेको आगोले वनजंगल तथा कृषि भूमि नष्ट गरेको अराघचीले जनाए। संयुक्त राष्ट्रसंघमा पेस भएका प्रतिवेदन तथा दस्तावेजका आधारमा लाखौँ वर्गमिटर जमिन जलेको र हजारौँ जैतुनका रूखमा क्षति पुगेको उनले उल्लेख गरे।
इरानतर्फ अमेरिका र इजरायलले देशका तेल भण्डार, प्रशोधन केन्द्र तथा ऊर्जा पूर्वाधारमा गरेका आक्रमणले पनि गम्भीर वातावरणीय जोखिम उत्पन्न गरेको विदेशमन्त्री अराघचीको भनाइ छ।
