आईसीसी क्रिकेट विश्वकप लिग २ अन्तर्गत ओमानमा भएको आफ्नो अन्तिम शृङ्खला सकाएर नेपाली राष्ट्रिय क्रिकेट टोली मंगलबार बेलुकी काठमाडौं आइपुगेको छ ।
अन्तर्राष्ट्रिय विमानस्थलमा ओर्लिएको टोलीलाई नेपाल क्रिकेट संघ (क्यान) का तर्फबाट राजेश महर्जन, खेमराज अवस्थीलगायतले स्वागत गरेका छन् ।
ओमान र क्यानडासँग खेलिएको सो शृङ्खलामा नेपालले चारमध्ये तीन खेल जित्यो । ओमानविरुद्ध दुवै खेल आफ्नो पक्षमा पारेको नेपालले क्यानडासँग भने एक खेलमा जित र एक खेलमा हार बेहोर्यो ।
छैटौं स्थानमा रहँदै मान्यता सुरक्षित
लिग २ का सबै ३६ खेल पूरा गर्दा नेपाल ३० अंकसहित छैटौं स्थानमा रह्यो । छैटौं स्थानभित्र रहनु ओडीआई मान्यता कायम राख्नका लागि निर्णायक थियो, त्यसैले यो नतिजा नेपालका लागि अर्थपूर्ण बनेको छ ।
स्वदेश फर्किएका खेलाडीहरू अब दसैंको टिकापछि एनपीएलको तयारीमा जुट्नेछन् ।
