सोलुखुम्बुको खुम्बु पासाङल्हामु गाउँपालिका–४, फेरिचेस्थित हेलिप्याडमा मंगलबार बिहान दुई हेलिकप्टर ठोक्किँदा एक विदेशी नागरिकको मृत्यु भएको छ भने एक जना घाइते भएका छन्।
नेपाल प्रहरीको प्रारम्भिक विवरणअनुसार बिहान ८:११ बजेको समयमा अवतरण गर्ने क्रममा फिस्टेल एयर र डाइनास्टी एयरद्वारा सञ्चालित हेलिकप्टर एकआपसमा ठोक्किएका थिए। दुर्घटना हेलिप्याडमै भएको प्रहरीको भनाइ छ।
ठोक्किएलगत्तै हेलिकप्टरमा आगलागी भने भएको छैन। घाइते व्यक्तिलाई उपचारका लागि प्रभु हेलिकप्टरमार्फत लुक्ला पुर्याइएको प्रहरीले जनाएको छ।
मृतक र घाइतेको परिचय तथा दुर्घटना हुनुका कारणबारे थप विवरण आउन बाँकी रहेको प्रहरीले जनाएको छ।
