घरेलु बजारमा सर्वाधिक कमाउने फिल्मको रूपमा गौंथलीले आफ्नो अग्रता कायम राखेको छ । फिल्म विकास बोर्डको साप्ताहिक बक्स अफिस प्रतिवेदनअनुसार यस फिल्मले हालसम्म २६ करोड ७ लाख ५० हजार रुपैयाँ आम्दानी गरिसकेको छ भने टिकट बिक्री एक करोडको हाराहारीमा पुग्न लागेको छ ।
नोभेम्बर १ को राति ११ः५९ बजेसम्मको अभिलेखअनुसार देशभर गौंथलीका ९ लाख ४६ हजार ८६४ टिकट बिक्री भएका छन् । पछिल्ला नेपाली रिलिजमध्ये सबैभन्दा सशक्त प्रदर्शन गरेको यस फिल्मले दश लाख टिकटको आँकडा नजिकै पुगेर पनि शीर्ष स्थान सुरक्षित राखेको छ ।
दोस्रो र तेस्रो स्थानमा कुन फिल्म
आम्दानीको हिसाबले कबड्डी ५ः आफ्टर द फाइनल दोस्रो स्थानमा छ, जसले ३ लाख ४६ हजार ४२७ टिकटबाट १० करोड ७६ लाख ७० हजार रुपैयाँ जोडेको छ । त्यसलगत्तै पेन्सन पट्टा तेस्रो स्थानमा देखिएको छ । यसले ३ लाख ६२ हजार २०१ टिकट बिक्री गर्दै १० करोड २८ लाख २० हजार रुपैयाँ संकलन गरेको छ । कबड्डी ५ भन्दा बढी टिकट बिक्री हुँदाहुँदै पनि पेन्सन पट्टाको आम्दानी केही कम रहेको तथ्याङ्कले देखाउँछ ।
अन्य प्रमुख नेपाली फिल्ममध्ये आ बा आमा २ ले २ लाख १३ हजार १९४ टिकटबाट ६ करोड २४ लाख रुपैयाँ कमाएको छ भने बाः एक योद्धाले १ लाख २७ हजार २१७ टिकटबाट ३ करोड ५४ लाख ४० हजार रुपैयाँ आर्जन गरेको छ ।
रोहित अधिकारीको निर्माण तथा दीपेन्द्र लामाको निर्देशन रहेको छ माया छपक्कै २ ले १ लाख ३ हजार ९७९ टिकटबाट ३ करोड ३४ लाख ८० हजार रुपैयाँ संकलन गरेको छ । सूचीमा परेको १२ गाउँ २ ले ७४ हजार ८०३ टिकटबाट २ करोड २९ लाख ५० हजार रुपैयाँ जोडेको छ ।
बोर्डले सार्वजनिक गर्ने यी साप्ताहिक विवरण देशभरका सिनेमाघरबाट संकलित टिकट बिक्री तथा आम्दानीको आधिकारिक अभिलेखमा आधारित छन् ।
