बाराको जितपुर सिमरा उपमहानगरपालिका–१६, धर्मनगरमा बाँदर लखेट्ने क्रममा पड्काइएको अग्लो बन्दुक (मजल लोडिङ गन)को छर्रा लागेर एक जना घाइते भएका छन्। सोमबार साँझ करिब ६ः३५ बजे भएको घटनामा स्थानीय ३२ वा ३३ वर्षीय उत्तम रामौली मगर घाइते भएका हुन्।
प्रहरीका अनुसार बाँदर भगाउनका लागि सोही ठाउँका ३० वर्षीय गोबिन्द थाडा मगरले उक्त बन्दुक पड्काएका थिए। छर्रा लागेपछि घाइते रामौली मगरको बिरगञ्जस्थित नेपाल मेडिसिटी बयोधा अस्पतालमा उपचार भइरहेको छ।
घटनाको जानकारी पाएपछि जिल्ला प्रहरी कार्यालय बारा, डुम्बरवाना अस्थायी प्रहरी पोस्ट र सिमरा क्षेत्रीय प्रहरी कार्यालयबाट खटिएका प्रहरी टोलीले गोबिन्द थाडा मगरलाई दुईवटा बन्दुकसहित नियन्त्रणमा लिएका छन्। सिमरा क्षेत्रीय प्रहरी कार्यालयले घटनाबारे अनुसन्धान अघि बढाएको छ।
