स्यान्डपेपर प्रकरण : ख्वाजाको दाबी पूर्ण सत्य भन्दै वार्नरले नेपालबाटै जारी गरे सन्देश

अस्ट्रेलियाका पूर्व ओपनर डेभिड वार्नरले सन् २०१८ को बल टेम्परिङ अर्थात् स्यान्डपेपर प्रकरणबारे उस्मान ख्वाजाले सार्वजनिक गरेको दाबीमा पूर्ण समर्थन जनाएका छन् । एनपीएल खेल्न नेपालमा रहेका वार्नरले सामाजिक सञ्जाल इन्स्टाग्राममार्फत भिडियो सन्देश जारी गर्दै ख्वाजाको भनाइ शतप्रतिशत सही रहेको बताएका छन् ।

आफ्नो नयाँ पुस्तक ‘सब्र’ मा ख्वाजाले दक्षिण अफ्रिका भ्रमणका क्रममा बल रिभर्स स्विङ गराउन स्यान्डपेपर प्रयोग गर्ने योजनाबारे टेस्ट टोलीका सबै सदस्य जानकार रहेको दाबी गरेका थिए । ब्याटर, बलर र टोलीसँग जोडिएका अन्य कर्मचारीसमेत त्यसबारे जानकार रहेको उनको भनाइ थियो । वार्नरले भने आठ वर्षपछि यो विषयमा बोल्दै ख्वाजाले त्यसबेलाको सत्य बाहिर ल्याएको र आफू उनका पक्षमा उभिएको जनाएका छन् ।

अनुसन्धान प्रक्रियामाथि प्रश्न

वार्नरले स्यान्डपेपर प्रकरणको छानबिन प्रक्रियामाथि पनि असन्तुष्टि जनाएका छन् । तत्कालीन अनुसन्धान हतारमा भएको र प्रभावकारी नरहेको उनको दाबी छ । क्यामरन ब्यानक्रफ्टसँगै रहेका ख्वाजाको अन्तर्वार्तासमेत नलिइएको भन्दै उनले अनुसन्धान पूर्ण नभएको औँल्याएका छन् ।

यसलाई पुराना घाउ फेरि कोट्याउने प्रसंगका रूपमा नभई जवाफदेहिता र पारदर्शितासँग जोडिएको विषयका रूपमा लिनुपर्ने उनको भनाइ छ । सत्यलाई उचित ढंगले बाहिर ल्याउनु आवश्यक रहेको उनले बताएका छन् ।

क्रिकेट अस्ट्रेलियाको अस्वीकार

क्रिकेट अस्ट्रेलियाले भने ख्वाजाको दाबी अस्वीकार गरेको छ । अस्ट्रेलियाका तीव्र गतिका बलर प्याट कमिन्स, मिचेल स्टार्क, जोस हेजलवुड र नाथन लियोनले संयुक्त वक्तव्य जारी गर्दै न्युल्यान्ड्समा ठूलो पर्दामा ब्यानक्रफ्टले स्यान्डपेपर प्रयोग गरेको दृश्य देखेपछि मात्र आफूहरूलाई त्यसबारे जानकारी भएको स्पष्ट पारेका छन् ।

सन् २०१८ मा दक्षिण अफ्रिकाविरुद्धको टेस्ट खेलमा बलको अवस्था परिवर्तन गर्न स्यान्डपेपर प्रयोग गरेको घटना सार्वजनिक भएपछि तत्कालीन कप्तान स्टिभ स्मिथ, उपकप्तान वार्नर र ब्यानक्रफ्टमाथि कारबाही भएको थियो । क्रिकेट अस्ट्रेलाले स्मिथ र वार्नरलाई एक वर्ष तथा ब्यानक्रफ्टलाई नौ महिनाका लागि प्रतिबन्ध लगाएको थियो ।

पूर्वप्रशिक्षक र खेलाडीको प्रतिक्रिया

अस्ट्रेलियाका पूर्व प्रशिक्षक ड्यारेन लेहम्यानले भने टोलीका सबै सदस्यलाई स्यान्डपेपर प्रयोगबारे जानकारी थियो भन्ने आफूलाई नलागेको प्रतिक्रिया दिएका छन् । बल टेम्परिङ क्रिकेटमा लामो समयदेखि हुँदै आएको भए पनि त्यसको तरिका र घटनाबारे कसलाई कति जानकारी थियो भन्ने पक्ष फरक रहेको उनको भनाइ छ ।

ब्याटर ट्राभिस हेडले अब यो प्रकरणबाट अघि बढ्नुपर्ने बताएका छन् । सन् २०१८ यताका वर्षमा टोली र क्रिकेट अस्ट्रेलियाको नेतृत्वमा धेरै परिवर्तन भइसकेको उनले उल्लेख गरेका छन् । त्यस्तै, ब्याटर निक म्याडिन्सनले पुरानो प्रकरण फेरि चर्चामा आउनु दुःखद भएको प्रतिक्रिया दिएका छन् । यसले विशेषगरी स्मिथ, वार्नर र ब्यानक्रफ्टलाई कठिन समयको पुनःस्मरण गराउने उनको भनाइ छ ।