मकवानपुरको भीमफेदी गाउँपालिका–६ चिसापानीगढीमा विद्युतीय हायस दुर्घटनामा ज्यान गुमाएका सर्लाहीको चक्रघट्टा गाउँपालिका–४ सुन्दरपुरका १३ जनाको शव शुक्रबार साँझ गाउँमा ल्याइएको छ । पोस्टमार्टम सकिएपछि आफन्तले शव बुझेर सुन्दरपुरतर्फ लगेका हुन् ।
बिहीबार बिहान पौने ६ बजेतिर काठमाडौंबाट छठ पर्व मनाउन सर्लाही फर्कँदै गरेको हायस चिसापानीगढीमा सडकबाट करिब पाँच सय मिटर तल खसेको थियो । उक्त घटनामा सुन्दरपुरका १३ जना र कविलासी नगरपालिका–८ अगर्वाका हायस चालक ३० वर्षीय रवीशङ्करकुमार मण्डल गरी १४ जनाको मृत्यु भएको थियो । दुर्घटनामा परेका अन्य ६ जना घाइते भएका छन् ।
उचित राहत र क्षतिपूर्तिको सुनिश्चितता नभएसम्म शव नबुझ्ने अडान पीडित परिवारले लिएका थिए । सोही कारण शव केही समय हेटौंडा अस्पतालमा राखिएको थियो । मृतकका प्रत्येक परिवारलाई १० लाख रुपैयाँ क्षतिपूर्ति, परिवारका एक सदस्यलाई रोजगारी र घाइतेको उपचार खर्च सरकारले बेहोर्नुपर्ने माग परिवारहरूले राखेका थिए ।
छानबिन समितिसँग सहमति, शव हस्तान्तरण
सरकारले गठन गरेको दुर्घटना छानबिन समिति र पीडित परिवारबीच सहमति भएपछि शुक्रबार शव बुझ्ने प्रक्रिया अघि बढेको हो । सहमतिअनुसार कानुनबमोजिम पाउने राहत तथा क्षतिपूर्ति तत्काल उपलब्ध गराउन सरकारले पहल गर्ने भएको छ ।
थप राहत तथा क्षतिपूर्तिको व्यवस्थाका लागि जिल्ला प्रशासन कार्यालय मकवानपुरले प्रधानमन्त्री तथा मन्त्रिपरिषद्को कार्यालयमा औपचारिक आग्रह गर्ने सहमति बनेको मकवानपुरका सहायक प्रमुख जिल्ला अधिकारी शेषकान्त पौडेलले जानकारी दिए ।
एउटै गाउँमा शोक, सामूहिक अन्त्येष्टिको तयारी
एउटै बस्तीका १३ जनाको ज्यान गएपछि सुन्दरपुरमा शोक छाएको छ र सामूहिक अन्त्येष्टिको तयारी भइरहेको छ । मृतक सबैको शुक्रबार राति नै एकै स्थानमा धार्मिक तथा सांस्कृतिक परम्पराअनुसार अन्तिम संस्कार गरिने मृतकका छिमेकी नितेश यादवले बताए ।
गाउँपालिका अध्यक्ष कृष्णकुमार यादवका अनुसार मृतक १३ जनाको गाउँको पश्चिमतर्फ रहेको लखन्देही नदीमा सामूहिक अन्त्येष्टि गरिनेछ ।
यसैबीच चक्रघट्टा गाउँपालिकाले शुक्रबार शोक बिदा दिएको थियो भने मृतकका परिवारलाई जनही ५० हजार रुपैयाँ उपलब्ध गराउने निर्णय गरेको छ । मधेस प्रदेश सरकारले पनि प्रत्येक मृतक परिवारलाई एक लाख रुपैयाँ राहत दिने निर्णय गरेको छ ।
