मकवानपुरको भीमफेदी गाउँपालिका–६ स्थित चिसापानीगढीमा माइक्रोबस सडकबाट करिब सात सय मिटर तल खस्दा चालकसहित १४ जनाको मृत्यु भएको छ। दुर्घटनामा घाइते भएका ६ जनालाई थप उपचारका लागि काठमाडौं पठाइएको छ।
मृत्यु हुनेमध्ये चालकबाहेक १३ जना सर्लाहीको चक्रघट्टा गाउँपालिका–४ स्थित सुन्दरपुरटोलका बासिन्दा हुन्। चालक रविशङ्कर कुमार मण्डल सर्लाहीको कविलासी नगरपालिका–८ अगर्वाका हुन्। मृत्यु हुने सबैजसो काठमाडौंमा तरकारी तथा फलफूलको व्यापार गर्दै आएका थिए र छठ पर्व मनाउन घरतर्फ फर्किंदै थिए।
दुर्घटनाको सबैभन्दा ठूलो पीडा एउटै परिवारले बेहोर्नुपरेको छ। सुन्दरपुरटोलकी निर्मला देवी यादवले एकै दुर्घटनामा दुई छोरा, बुहारी र तीन नातिनी गुमाएकी छन्। छठका लागि पूजा सामग्री जोहो गरिसकेकी उनलाई बिहानै दुःखद् खबरले होस उडाएको थियो। बुधबार साँझ काठमाडौंबाट हिँडेका छोराबुहारी र नातिनातिना बिहान आइपुग्ने प्रतीक्षामा रहेकी निर्मलालाई आफन्तले दुर्घटनास्थल नजिकै पुर्याएका थिए।
एउटै परिवारका छ जनाको ज्यान गयो
दुर्घटनामा निर्मलाका छोरा २५ वर्षीय विकेश यादव र १७ वर्षीय सुदेश यादवको मृत्यु भएको छ। यसैगरी बुहारी २५ वर्षीया पुनम यादव तथा छोरीहरू १० वर्षीया अनु कुमारी यादव, ७ वर्षीया दिक्षा यादव र ५ वर्षीया दीपिका यादवको पनि ज्यान गएको छ। आठ महिनाकी गर्भवती रहेकी पुनमसँगै गाडीमा सवार उनका १५ महिने छोरा सुदीप भने घाइते भएका छन्।
परिवारका अर्का सदस्य अवधेश यादव भने दुर्घटनाबाट बाँच्न सफल भएका छन्। उनले परिवारलाई घर पठाउन बिहीबार राति २ बजे १२ हजार रुपैयाँमा विद्युतीय माइक्रोबस रिजर्भ गरेका थिए र आफू पछि मोटरसाइकलमा आउने तयारीमा थिए। परिवार पठाएको केही समयमै दुर्घटनाको खबर आएपछि उनी स्तब्ध बनेका छन्। छिमेकीका अनुसार अवधेशसँगै उनका १५ महिने छोरा पनि बाँचेका छन्, जसको काठमाडौंको मेडिसिटी अस्पतालमा उपचार भइरहेको छ।
एक दशकभन्दा बढी समयदेखि काठमाडौंमा तरकारी र फलफूल बेचेर परिवार धान्दै आएका अवधेशले भाइहरूको पढाइमा पनि सहयोग गरेका थिए। कान्छा भाइ विकेशलाई सिभिल सबइन्जिनियर पढाएका उनले पढाइ सकिएपछि लोकसेवाको तयारी गर्दै थिए। अर्का भाइ सुदेश दसैँमा मात्र काठमाडौं गएका थिए र फुर्सदको समयमा दाइलाई व्यवसायमा सघाउँथे।
शोकमा डुबेको सुन्दरपुरटोल
दुर्घटनामा परेका अन्यमध्ये सुन्दरपुरटोलकै ३५ वर्षीय गुड्डु यादव, उनकी ३० वर्षीया श्रीमती गायत्री देवी यादव, २५ वर्षीय रामदुलार यादव, २४ वर्षीय सुबोध यादव, ४० वर्षीय राकेश यादव, उनका १५ वर्षीय छोरा रोहन यादव र राकेशका २५ वर्षीय सालो रामप्रवेश यादव (छोटु) रहेका छन्।
घाइते हुनेमा ३३ वर्षीय मुकेश यादव, ५ वर्षीय सक्षम कुमार यादव, ३ वर्षीय सुजन यादव, ३१ वर्षीय देवेन्द्र राय (बेचु), २६ वर्षीय देवेन्द्र राय र अवधेशका १५ महिने छोरा सुदीप यादव छन्।
अवधेशका बुवा रामसुनार यादवको आठ वर्षअघि भारतको चण्डीगढमा रोजगारीका क्रममा निधन भएको थियो। त्यसपछि परिवारको जिम्मेवारी अवधेशकै काँधमा आएको थियो। काका प्रेमलाल रायका अनुसार परिवारको आर्थिक अवस्था कमजोर छ र उनीहरूसँग पर्याप्त जग्गाजमिन छैन। गाउँमा ५–७ धुर जग्गामा बनेको झुप्रो घर र ३–४ कठ्ठा खेत मात्र छ। "अब निर्मला र अवधेशले कसरी धैर्य राख्छन्," स्तब्ध काका प्रेमलालले भने।
एउटै टोलका धेरै जनाको ज्यान गएपछि सुन्दरपुरटोलमा सन्नाटा छाएको छ। चाडपर्वको उल्लास हराएको छ र छिमेकीहरू शोकमा डुबेका छन्। यसपटकको छठमा सुन्दरपुरटोलमा परेको यो बज्रपातअघि त्यस्तो क्षति कहिल्यै भएको थिएन।
