मुख्य सामग्रीमा जानुहोस्

म्याग्दीको बेनीमा तराईबासीद्वारा छठ पर्व मनाइयो, कालीगण्डकी किनारमा अर्घ्य अर्पण

हिमाली जिल्ला म्याग्दीको सदरमुकाम बेनीमा आइतबार छठ पर्व मनाइएको छ। जलजला गाउँपालिका–३ स्थित कालीगण्डकी नदी किनारमा भेला भएका मिथिलाञ्चलवासीले छठी देवीको पूजा गरी अर्घ्य अर्पण गरेका छन् भने सोमबार बिहान उदाउँदो सूर्यलाई…

विश्वपत्र संवाददाता

· १ मिनेटको पढाइ

२पटक हेरिएको०टिप्पणी०शेयर
स्रोत:Nagariknetwork
म्याग्दीको बेनीमा तराईबासीद्वारा छठ पर्व मनाइयो, कालीगण्डकी किनारमा अर्घ्य अर्पण
Nagariknetwork

म्याग्दी जिल्लाको सदरमुकाम बेनीमा बसोबास गर्दै आएका तराईबासी नेपाली तथा भारतीय नागरिकले आइतबार छठ पर्व मनाएका छन्। जलजला गाउँपालिका–३ पर्ने कालीगण्डकी नदीको किनारमा जम्मा भएर मिथिलाञ्चलवासीले छठी देवीको पूजाआजा गरेका छन् र नदीमा गएर अर्घ्य अर्पण गरेका छन्।

सूर्यदेवको उपासनासँग जोडिएको यो पर्व हरेक वर्ष कार्तिक शुक्ल चतुर्थीमा सुरु भई सप्तमीसम्म मनाइन्छ। धार्मिक आस्थाका साथै सामाजिक सद्भावको सन्देश बोक्ने पर्वका रूपमा यसलाई लिइन्छ। आइतबार साँझ कालीगण्डकी किनारमा पूजा र अर्घ्य सम्पन्न भएपछि व्रतालुले सोमबार बिहान उदाउँदो सूर्यलाई अर्घ्य चढाउने तयारी गरेका छन्। तीन दिनसम्म पानीसमेत नखाई व्रत बसेका उनीहरूले विधिपूर्वक पूजा गरेका थिए।

बेनीमा व्यवसाय गर्दै आएकी प्रतिमा शाहका अनुसार व्रतालुले स्नान गरी शुद्ध वस्त्र लगाएर व्रत बस्ने गर्छन्। व्यावसायिक व्यस्तताका कारण जन्मथलो जान नपाए पनि आफू बसेकै ठाउँमा सामूहिक रूपमा पर्व मनाइएको किसन शाहले बताए।

नाङ्लो–कनसुप्तीमा सजिएका प्रसाद

नाङ्लो, कनसुप्ती, ढकना र सरबालगायत भाँडामा प्रसाद राखेर नदी किनारमा उभिएका व्रतालुले सूर्यलाई अर्घ्य चढाएका थिए। ठकुआ, भुसवा, केरा, नरिवल, उखु, सुन्तला, कागती, फर्सी, सिंगारा, पान, सुपारी, धूप, दीप, अरतक, पात र चनालगायत सामग्रीबाट प्रसाद तयार पारिएको थियो।

पर्व मनाउन जम्मा भएका मिथिलाञ्चलवासीलाई बेनीमा बसोबास गर्ने अन्य समुदायले पनि शुभकामना दिएका थिए। छठको पूजा देखेर सुरुमा अनौठो माने पनि आफ्नै जन्मथलोमा जसरी विधिपूर्वक पर्व मनाइएको उमाशङ्कर शाहले बताए।

म्याग्दीका विभिन्न ठाउँमा करिब दुई सय तराईबासी बसोबास गर्छन्। व्यावसायिक तथा पारिवारिक कारण घर जान नपाउनेका लागि पछिल्ला केही वर्षयता बेनीमै छठ मनाउने व्यवस्था मिलाइएको सञ्जय ठाकुरले बताए। बेनीका करिब एक सय मिथिलाञ्चलवासी यसपालि जन्मथलो गएका र नगएकाले बेनीमै पर्व मनाएको उनको भनाइ छ।

विसं २०७७ सालदेखि तराईबासीले म्याग्दीमा छठ मनाउन थालेका हुन्। सरकारले विसं २०७६ फागुनमा म्याग्दीलाई हिमाली जिल्लाका रूपमा सूचीकृत गरेको थियो।