एसिया कप राइजिङ स्टार्स प्रतियोगिताअन्तर्गत आफ्नो पहिलो खेलमा नेपालले दोहामा भारत ए सँग प्रतिस्पर्धा गरिरहेको छ। नेपालले टस जितेर पहिले फिल्डिङ गर्ने निर्णय लिएपछि ब्याटिङमा उत्रिएको भारत ए ले ठूलो योगफलतर्फ यात्रा तय गरेको छ।
सुरुवाती चरणमा दबाबमा परेको भारत ए ले ४२ रन जोड्दै गर्दा तीन विकेट गुमाएको थियो। त्यसपछि कप्तान तिलक वर्मा र कुमार कुसाग्राले इनिङ्स सम्हाले। दुवैले २०६ रनको साझेदारी गरेपछि भारत ए को योगफल उच्च बन्दै गयो।
ललित राजवंशीले कुमार कुसाग्रालाई बोल्ड गर्दै त्यो लामो साझेदारी तोडे। कुसाग्रा ११७ रनमा पवेलियन फर्किए भने तिलक वर्मा शतकतर्फ अघि बढिरहेका छन्।
४४ ओभरको खेल सकिँदा भारत ए ले चार विकेट गुमाएर २६७ रन बनाएको छ। यसअघि वैभव सूर्यवंशी २६ रन, अभिशेख शर्मा ९ रन र आयुश बडोनी २ रनमा आउट भएका थिए।
नेपालका तर्फबाट ललित राजवंशीले दुई विकेट लिएका छन्। नन्दन यादव र पवन सर्राफको नाममा एक–एक विकेट छ।
नेपालले यो प्रतियोगितामा आफ्नो पहिलो खेल खेलिरहेको हो। सुरुवाती तीन विकेट छिटो गुमे पनि त्यसलाई साझेदारीमा परिणत गर्दै भारत ए ले अन्तिम ओभरहरूमा रनगतिलाई तीव्र बनाएको छ।







