भ्रष्टाचारविरोधी अभियन्ता प्रेमध्वज लामाले आगामी स्थानीय निर्वाचनमा भ्रष्टाचारीलाई हराउने लक्ष्यका साथ भक्तपुर र काभ्रेमा अभियान सञ्चालन गर्ने घोषणा गरेका छन्। भ्रष्टाचारमुक्त समाज निर्माण गर्ने उद्देश्य राखेका उनले आसन्न निर्वाचनमा सक्रिय भूमिका निर्वाह गर्ने प्रतिबद्धता जनाएका छन्।
काभ्रेको नमोबुद्धमा घर भए पनि हाल भक्तपुरमा बसोबास गर्दै आएका लामाले निर्वाचनलाई सुशासन, पारदर्शिता र भ्रष्टाचारविरुद्धको अभियानसँग जोड्ने बताएका छन्। स्थानीय तहमा हुने गतिविधि, निर्णय र कामकारबाहीलाई पारदर्शी तथा जनउत्तरदायी बनाउन नागरिकको भूमिका महत्वपूर्ण हुने उनको भनाइ छ। निर्वाचनका क्रममा भ्रष्टाचार, अनियमितता र जनहितविपरीतका गतिविधिविरुद्ध आवाज उठाउनुपर्ने पनि उनले औंल्याएका छन्।
उनको सार्वजनिक सन्देशमा ‘समाजको हित, राष्ट्रको समृद्धि हाम्रो प्रतिबद्धता’ भन्ने नारालाई प्राथमिकता दिइएको छ। भक्तपुर र काभ्रेलाई आफ्नो कार्यक्षेत्र भनी उल्लेख गर्दै लामाले आगामी निर्वाचनमा प्रत्यक्ष वा अप्रत्यक्ष रूपमा भूमिका निर्वाह गर्ने जनाएका छन्।
यसैबीच, उनी आफैं भने निर्वाचनमा उम्मेदवार नबन्ने स्पष्ट पार्छन्। भ्रष्टाचारी पार्टी र तिनका उम्मेदवारलाई हराउँदै स्वच्छ छवि भएका जुनसुकै पार्टी तथा स्वतन्त्र उम्मेदवारलाई समर्थन गर्ने उनको भनाइ छ।



