रोपाइँ छाडेर निजगढमा उकुसमुकुस : मिटरब्याजपीडितको चार दिने आन्दोलन

बारा — रोपाइँको चटारोको समयमा पनि मिटरब्याजपीडितहरूले आफ्ना खेतबारी छाडेर निजगढमा आन्दोलन जारी राखेका छन्। गत सोमबारदेखि उनीहरू निजगढ उद्योग वाणिज्य संघको सभाहलमा कोचाकोच भएर बस्दै आएका छन्। करिब दुई सय आन्दोलनकारी त्यहाँ छन्।

यसअघि पैदल यात्रा गर्दै मधेश प्रदेशका चार जिल्ला पार गरेर पाँचौं जिल्ला बाराको निजगढ पुगेका उनीहरूको गन्तव्य काठमाडौं थियो। तर गृहमन्त्री सुधन गुरुङ मंगलबार नै निजगढ आइपुगेपछि उनीहरू यतै रोकिएका हुन्।

असहज बसाइ र दैनिकी

सभाहलमा तीनवटा मात्र साना शौचालय छन्। जस्ताले छाएको सानो ट्रस्टमा खाना पकाइन्छ। बिजुली र पंखाको सुविधा भए पनि सयौं महिला र पुरुष भुइँमा सुतेर रात बिताइरहेका छन्। सामूहिक रूपमा खाना पकाएर खाने र सरकारविरुद्ध नारा लगाउने गरिएको छ।

बारा देवताल गाउँपालिका-४ पिप्राढीका भैरो रामले भने, ‘खेतीपाती छाडेर उकुसमुकुस भएर बसेका छौं। बस्ने, खाने, नित्यकर्म गर्न साह्रै कठिनाइ छ। पटक-पटक आन्दोलन गर्दा थाकिसक्यौं। यसपालि सरकारसँग वार्ता गरेर माग पूरा हुने आशा छ। तर धान रोपाइँको चिन्ता बढी छ।’

६ बुँदे माग र वार्ता

मिटरब्याजपीडितहरूले फर्जी लिखत खारेज, मिटरब्याजविरुद्ध शक्तिशाली विशेष ऐन निर्माण, मिटरब्याजविरुद्ध प्राधिकरण गठन, सुदखोरको सम्पत्ति छानबिन, पीडितको सम्पत्ति फिर्ता र न्यायपूर्ण आर्थिक कारोबार सुनिश्चित हुनुपर्ने माग गर्दै आन्दोलन गरिरहेका छन्।

आन्दोलन समितिका अध्यक्ष अवधेश कुसवाहसहितको ६ सदस्यीय टोली गृहमन्त्री गुरुङसँग वार्ता गर्न काठमाडौं गएको छ। उनीहरू माग पूरा हुने आशामा बसेका छन्। निजगढ उद्योग वाणिज्य संघका अध्यक्ष दीपेन्द्र श्रेष्ठले भने, ‘पहिला पनि उनीहरू मार्चपासका क्रममा यहीँ बसेका थिए। अहिले पनि कतिपय पीडित यहीं छन्।’

अघिल्लो वर्ष पनि पीडितहरू यही हलमा बसेका थिए। त्यतिखेर पनि उनीहरूले आफ्ना माग राखेका थिए। यसपालि भने सरकारले माग पूरा गर्ने विश्वासमा उनीहरू कठिनाइ सहेर पनि आन्दोलनमा डटेका छन्। केही आन्दोलनकारी भने रोपाइँको हतारले घर फर्किएका छन्।