सांसदका स्वकीय सचिवको पारिश्रमिक र भत्ता वृद्धिमा सरकार सकारात्मक: अर्थमन्त्री वाग्ले

अर्थमन्त्री स्वर्णिम वाग्लेले सांसदका स्वकीय सचिवहरूको पारिश्रमिक वृद्धि र फिल्ड भ्रमण भत्तालाई समयानुकूल बनाउने विषयमा सरकार सकारात्मक रहेको बताएका छन्। शुक्रबार प्रतिनिधिसभा अन्तर्गतको अर्थ समितिको बैठकमा बोल्दै उनले स्वकीय सचिवहरूको सुविधा वृद्धिका लागि आवश्यक विधि र प्रक्रिया पूरा गर्न सरकार तयार रहेको उल्लेख गरे।

अर्थमन्त्री वाग्लेले भने, “फिल्ड भ्रमणको क्रममा उपलब्ध गराइने भत्ता लगायतका सुविधालाई विधि र प्रक्रिया पुर्याएर समयानुकूल बनाउन सरकार सकारात्मक छ। तलब वृद्धिको सन्दर्भमा हरेक सांसदको स्वकीय सचिवदेखि लिएर सबै कुरामा हामी उदार नै छौँ।” उनले फिल्ड भिजिट भत्तालाई पनि समयानुकूल बनाउन सकारात्मक रहेको स्पष्ट पारे।

राष्ट्र बैंक ऐन संशोधनबारे छलफलको तयारी

अर्थमन्त्री वाग्लेले नेपाल राष्ट्र बैंक ऐनमा प्रस्तावित संशोधनका विषयमा पनि धारणा राखे। उनले सो ऐनका विषयहरूलाई स्वस्थ र विधिसम्मत छलफलमार्फत टुंग्याउन सरकार तयार रहेको बताए। राष्ट्र बैंकको संरचना र पदाधिकारी नियुक्तिजस्ता विषयमा सरकार कठोर नहुने उनको भनाइ थियो।